U Dr. DRL Nonglait, u kyrtong MP ka National People’s Party (NPP) cha ka Bye Election ka Shillong Parliamentary Seat hawa wan paan kyrchaan na ki paidbah ha ka yalang wa da pynman ha Jowai ha Yungwalieh ka Dorbar Chnong Chiliangraij hei emlang nadooh u MLA ka Jowai, u Wailadmiki Shylla, kiwa yahkhmat ka Party wa kynthup ya u Hamletson Dohling, u HM Shangpliang wa kiwi, da ong u wa ka mat wa oo chim u ha kani ka kynti toh ka Language Policy, Education Policy, Secularism wei toh leh kiwa jooh lai e Memorandum u cha ka sorkar neibhah toh ki mat dawa yong ki paidbah.
Ong haroh u manda yasaaid u neibynta kini ki mat ymtoh u yasaaid u du nei bynta ka NPP, tangwa i yasaaid yong oo u man ko neibynta ki paidbah. Neitæ ym em leh man u du kam u kyrtong yong ka NPP tangwa oo toh u kyrtong ki paidbah waroh.
“Nga toh u kyrtong yong waroh kiwa thap Vote, kani toh ka yurim wa nga yieñ O, ym em yaleh pyrchah O weiyi weiyi tangwa nga u klam O neibynta ki paidbah, ym pynbaad pyrchah O yeiyi yeiyi tangwa nga u klam bait O neibynta ki paidbah wa i roi i paar,” da ong u Dr. DRL Nonglait.
“Kwah O wow kyrriah noh yei yoosih, u kyrriah yei pynchoi, tangwa u klam deiwa jai wei dei ya maya para bru. Lym maya i para bru para marjan kammon u ong i wa maya jaitbru”.
“Ini toh i khut yong nga wei lada em iwon iwon i thut i bakla ha ki por ki snem wa da lai boi yei u man nei wym biang ha ka ktien ka thylliej, i yatoh kaam wa kiwi wei u pynkut noh ki dei ya maap kylliang wei yakrelang chirup neibynta i roi i paar,” da pynrap u Dr. Nonglait.
Hawa klam, pynsñiaw haroh u i yaroh ya ki paidbah ka Jowai deiwa ong wa man ki kiwa maya yei roi i paar wa i lai chaphrang, na itæ i daw ki paidbah jied ki da uwa mihkhmat uwa ye wow pynmankaam yeitæ.
Hawa yaroh ya ki kaam wa bha wa ka sorkar da leh ko neibynta i ku i roi ka jylla ha kiwa boon ki bynta lada hei puræ puthi, i wai ki laad yoh khih, ki kaam wa tei wa chna, deiwa ong wa kani ka sorkar da pyrchang wanrah ko leh chiboon ki yarap lada toh ya ki khon khynroo khyllod wa ki manbei lyngba ki Scheme waphær waphær.
Ong u hajrong kat kini ki kaam wa bha ka sorkar lada ki paidbah won lai ngop ki hei chah pynbiej wa i yahbakla yong kiwi kiwa pynbaad boonjait boon rukom ya ka sorkar, tieñsaar wa lada wan da kawi won ka sorkar boi tang u pynchna ko ya ki Project warim leh ym ye ko. Heiyatoh wa ki thaw kreh namo ki Institute waphær waphær wa da wanrah da kani ka sorkar leh boi ym ye ki u pynlai chakhmat.
Kamtæ khut kyrpaad u ya ki paidbah u pteiñ yei ya krehlang wa kani ka sorkar khnang u nang ye u pynbha wei pynku chooh chooh ya ki bynta wa emkaam wei iwa kongsan tam toh u pynneh pynsah ya ka riti dustur.
Ong haroh u wa lada ki paidbah Khasi wa Jaiñtia yoobiang ki ya oo u mihkhmat cha Parliament, u chim u yei kitkhlieh neibynta u pynpsiah ya ka ktien Khasi ha ka 8th Schedule ka riti shynchaar, wei lada ye u pynpsiah, daw ye u wai ya ka Khasi Department ha kiwi kiwon ki University wei heitæ i por ki khynroo khyllood ka jylla Meghalaya wa puræ ha Delhi leh u yohlaad ki u puræ Khasi, neitæ kiwa Pass MA Khasi wa Ph.D Khasi u yoh ki u lai sikai ha Delhi University ya ka Subject Khasi.
Discussion about this post