Jowai: U Michael Myrchiang uwi wa da pyrchang wow kreh deiwa yieñ hei yong oo dahi ki kjat, kamjooh wow e khih e kreh leh ya ki khon khynroo khyllood lyngba ka “Calm Industry” næ ka karkhana pynmih umdih kawa da seiñ ha chnong Nongtalang, West Jaiñtia Hills District, hei yaklam u wa kiwa pathai khubor ynne ka sngi hajrong i lai luti wada khynjoh chisnem pura kani ka karkhana, da pynsñiaw u i ñiawliar neibhah hadooh katni wym em yoh yarap u na ka sorkar hei yatoh wei angnood yong oo wow pynheh pynkmai ya ka khnang yow rap ye u pynbiang yei emkaam ki paidbah.
“Nyngkong i thmu yong nga hi wow seiñ ya kani ka karkhana wym mut du yei myntoi samen, tangwa yow e khih e kreh leh ya ki khon khynroo khyllood”. Da ong u Michael Myrchiang.
Hei lai luti wa chisnem pura chem u wa dang em chiboon i emkaam i dawa wow pynbiang yow paidbah, tangwa i chem chitom toh neidaw wym yoh yarap u wow pynheh ya ka karkhana.
“Kamwa man kattæ em du 13 ngut kiwa kreh, tangwa i thmu yong nga hi ym wow e khih du 13 ngut, kwah O wow pynyoh khih hadooh 40, 50 ngut ki khynroo khyllood, tangwa wow em won kitæ kiwa kreh emkaam wow pynheh pynkmai chooh chooh ya ka karkhana, wow pynheh ya ka nawon emkaam yaki kor ki bor khamtam ka kor (Machine) wa rap heh, tangwa hajrong ini waroh i chem chitom toh ka poisa” ban chooh chooh u Michael.
Lyngba i lai luti da khana u, wa i dawa man i iwa boon neibhah boon ki bru yaroh ki ya ka um napoh thaaiñ Ri War wa man ko kawa bang, tangwa neidaw wa dang khian ka karkhana wei tlot i bor ka kor kamwa man kattæ du hapoh Ri-loom Jaiñtia leh wympu ye bha wow pynbiang um katkam i dawa ki paidbah.
Katwa kamtæ da kyntu u ya ki bor sorkar nadooh kiwa mihkhmat ka thaaiñ, ki yung krehkaam sorkar wa toh u pait kamwa da jooh li ood li naam u cha ki wow sñiawbha ki u e ka kti timun tidiang wei wow e i kyrchaan neibynta i myntoi waroh lang.
“Kamwa ka sorkar bei hi jooh pynchlur ko ya ki khon khynroo khyllood wow yieñ hei yong ki dahi ki kjat dei wow seiñ khih seiñ kreh khamtam haka juk katni wa duna i yoh khih yoh kreh, tangwa i wow kylli won mih i, wa kammon u ye ki wow seiñ khih lada ka sorkar ym e kyrchaan ko ya ki ? ” da pynrap u Michael Myrchiang .
Discussion about this post