Nirbhaya Case: Hadien 7 snem da pasi ya kiwa slaitbor wa kiwa pynyap ha Delhi

7 snem hadien kawi ka khyllood wa lai puræ Physiotherapy da chah slaitbor ko wei da pynmynsoo yaka hapoh kawi ka bus wa dang lai ha Delhi, i jia iwa da pynkhyrngiat yaka ri waroh kawi, 4 ngut na kiwa pynyap yaka da pasi yaki ynne i step heipor 5:30. I pasi da lai bait i hadien ar kynta waka Supreme Court da kyntait ko wow ap yeiwa kyrpaad kiwa da chah phah pasi.

U Akshay Thakur (31), u Pawan Gupta (25), u Vinay Sharma (26) wa u Mukesh Singh (32) da pasi yaki ha Tihar Jail, Delhi heiwa da kset yaki ha ki jar jiar ki thaw kset samen samen wei ym em bien ki leh wow baam yei baam wa khaddooh yong ki wei ym em paan ki yeiwa angnood wa khaddooh yong ki.

Da pyntip uwa pynlai yaka Jail wa uwi na ki da kyrpaad u wow pynlait im oo heipor wa yah ya oo cha i thaw pasi.

Yaka Tihar Jail da khang sbak nadooh ynnin i miet kawa man leh ka Jail kawa heh dooh hapoh Asia wei boon kiwa ym em yoh thiah chwa kani ka pasi kawa man kawa nyngkong nadooh u snem 2015, da pyntip kiwa pynlai yaka Jail.

Related posts

Yoh pynlait ya ka kynthai kawa na East Jaiñtia wa chah kset yabor ha Delhi

May 11, 2025

Yoh kem mooyong hadooh 6000 MT ha East Jaiñtia Hills

May 10, 2025

Ya kiwa chah pasi da kyrsu thiah yaki heipor 3:30 i step hadien wa da tip wa da kut ka luti ki waki yung kachari. Kini ki soo ngut ha kini ki bnai wa da dep da ye ki wow lait chi lait haka kynta chwa wow chah pasi ki deiwa kyrpaad cha ki yung bichaar.

“I da yang i da slem ya kani ka sngi. Ynne toh i sdang ka sngi thymme yaki khon kynthai ka India. Ya kini ki mrad da dep pasi,” da ong ka Asha Devi ka bei yong ka khyllood wa da khlaad kawa da tip maya yaka kam ka Nirbhaya iwa mut Fearless dei ktien phareng. Hadien waka Supreme Court e ko yaka hukum, liwan ko cha yung yow kdung yei dur ka khon ko.

Haka 16-12-12 ka Nirbhaya kawa em 23 snem hadien wan pait phlim ko wa u lok chynrang ko, da ku ki ha kawi ka bus ki bru samen yow liwan yung. 6 ngut ki chynrang kiwa em hapoh kani ka bus da dat ki ya u lok ko wei hadien won da khyrrup ki yaka. Kamwa chikynta da lehbeiñ ki ya kani ka kynthai chwa wow noh ki yaka cha rood sarok.

Tangwa im slem ko wow khana yeiwa jia hadooh wa yoh kem ya kiwa emkti, wei da khlaad ko ha Singapore ha i thaw wa da kit yaka wow sumaar yaka.

Na kini ki 6 ngut wa emkti, u Ram Singh da suba wa pasi u pyn da oo ya oo hi hapoh Jail katwa uwi won uwa duna 18 snem da pynlait ya oo hadien 3 snem wa kset ya oo hapoh ka Reform Home.

Ini i jia da pynbor ko yaka India wow pynkylla yaki aiñ wow yada yaki kynthai wei wow pynchitom joor ya kiwa emkti wow thombor yaki kynthai.