Jowai: Ka District Medical & Health Officer yong ka East Jaiñtia Hills District ka Dr. J. Lakiang ha i yachem wa ki dkhot ka seiñ MPUF hapoh i yahkhmat u K. Blah uwa man leh u President yong ka MPUF, da pynche ko hajrong i duna ka CHC Khliehriat kawa em 100 thaw thiah.
I lai yachem yong kiwa yahkhmat ka seiñ wa ka DM&HO toh hajrong i ujor yong ki paidbah wa ym em Doctor ha i por wa emkaam ki wakjut iwa da jia i por cha i por ya ki paidbah ka thaaiñ.
Ynnin ka sngi ha i yachem wa ka DM&HO, ka Dr. Lakiang da ong ko wa ha kani ka thaw sumaar emkaam ko yaka kor Ultrasound namo ka kor wa emkaam wow pait khamtam ya ki kynthai wa punkhon, kamwa man kattæ ka kor X-Ray kawa em hapoh kani ka thaw sumaar ym em man ko kawa krehkaam la ar snem kattu wei ym em leh wa pait wa sumaar yaka.
Chooh chooh neiliang ka DM&HO da kyntu ko ya kiwa mihkhmat wow pynbiang ya ki tiar kiwa emkaam hapoh kani ka Hospital, neibhah ki chnong kiwa em hapoh ka East Jaiñtia boon na ki ym em ki ya ki luti syngkieñ kiwa biang, kamtæ lada wan poi ki ha kani ka CHC leh ym myntoi ya ki neibhah wym em ki tiar wow sumaar wei ini man ko i eh wa khroo ya ki manbei wa pun wa kha wei kamjooh leh ya kiwa chitom. Wei na ini i daw wa hap ki wow phah bait ya ki bru cha ki thaw sumaar kam cha Shillong.
Heiyatoh won wa i yachem chitom ki paidbah, neiliang ka DM&HO da pyntip ko wa daw pynman yaka yachem lang wa waroh ki Doctor kiwa em ha kani ka CHC wow wan biang por ki.
Neiliang kiwa yahkhmat ka seiñ kiwa kynthup ya u K. Blah President ka MPUF, u Secretary u Thawlad Lyngdoh da kyntu joor ki ya u montri ka chait ka khiah u A.L. Hek wei kamjooh ya u montri naka thaaiñ u K. Shylla wow chimkhia wow pynbiang ya kani ka thaw e sumaar hapoh ka District.
Discussion about this post