U montri rangbahdooh ka ri u Narendra Modi da ong u ynnin toh ka sngi wow sahkynmoo yaka ri heiyatoh wa ki kaam rep heiwa da wanrah ya ka Agricultural Reforms Bill kawa da yoh leh yei mynjur kawa daw pynlaitlooid yaki warep na kiwa boon kiwa jooh khang jooh kdoh yaki. Da e khublei u leh ya ki warep kiwa daw yoh chooh boon ki laad wow dai yaki mar yong ki. Da ong u leh wa kini ki pynkylla daw pynlait ko ya ki warep na ki “Middlemen” kiwa chim chiboon yei nong ki warep.
Hawa beiñ ya ka liang pyrchah deiwa ong wa da pynpoor ki ya ki khubor thok heiyatoh waka Agriculture Reforms Bill, da ong u leh wa kini toh kiwa da synchaar yaka ri da ki phaw snem wei da pyrchang ki wow yahbakla ya ki warep heiyatoh wa ini i kaam.
Da ong u wa ki kyndon ki yaw mar-rep ka Agriculture Produce Market Committee (APMC) Act kiwa u pyndam noh deiwa wanrah da kiwa thymme, toh kiwa da kular leh haka Election Manifesto ki Party ki liang pyrchah kiwa da pyrchah ya kini ki jooh katni. Da kyntait u leh yeiwa kam wa daw pyndooh yaka Minimum Support Price (MSP) deiwa ong wa ka sorkar ka yaleh ko wow pynyoh yei dor wa biang dooh ya ki warep lyngba ka MSP kamjooh deiwa thied daka sorkar yaki mar kamwa da jooh leh.
Da ong u leh wa manda krehkaam ki kyndon wa thymme ki warep ye ki wow dai hei dor wa kwah ki ha kiwon kiwon ki yaw hapoh ka ri. Chooh chooh da ong u wa hadien wa da yoo yei ktah ka APMC Act, u Chief Minister ka Bihar da pyndam u ya kani ka aiñ na Bihar. Da khana u leh ya kiwa da sdang ka sorkar yow yarap yaki warep kam ka Pradhan Mantri Kisan Kalyan Yojana, Pradhan Mantri Krishi Sinchai Yojana, Neem Coated Urea, ki thaw booh yaki mar rep kam ki Cold Storage kiwa da chna ha kiwa boon ki thaw hapoh ka ri.
U Modi da phah u ya i klam wa che cha ki warep wa ymtoh wow chah yah bakla ki deiwa pynrap wa kini ki bru wa kam toh yow yada yaki warep, tangwa i kwah yong ki toh wow kdooh u khoom yaki warep deiwa kyrchaan leh yaki “Middlemen” kamjooh ya kiwi kiwa lute yei nong ki warep.