Jowai: Ynne ka 26 tarik heipor kamwa 1:30 i sngi, i kynroh yong ka skur Govt. Boys Higher Secondary School, Jowai kawa em ha Chutwakhu da oor i nei joor u slap wa i bor i khyndaw hadooh wa da pra i kynroh wei da tooid i khyndaw cha ki manyung wa em ha wah wei mar pyrchah, wei ini i khyndaw da psiah i chadooh ki kamra yung.
Ki yung wa da chah ktah toh ar tylli ki yong ka Chilhim Kamar, i yung yong ka Deogrecia Pohshna waka Lumilos Dkhar.
Nalor i chah ktah kitai ki yung, kawi ka kari WagonR wa pynyieñ ha i thaw wa jia da chah rah ko hei bor i khyndaw.
Katkam wa lum yutip na u waheh chnong ka Chutwakhu u D. Pyrbot da ong wa embhah wa ha ini i jia ym em wa mynsoo bru hanla i oor khyndaw man i iwa rap joor.
Kam wow pynkynmoo wa ini i kynroh yong katai ka skur ha u snem 2004 da dep oor i wei i yung wa chah ktah toh i yong ka Chilhim Kamar hi neidaw wa em i hakhmat.
Hadien ini i jia, da pynchna ya itai i thaw tangwa ha kani ka kynti i oor i kynroh toh iwa rap haneiñ ym toh ha i jooh wa da dep chna.
Discussion about this post