I hiar u slap wa joor wa da neh nadooh ynnin hadooh ynne ka sngi da wanrah u yei chlai um, i oor khyndaw ha kylleiñ ki thaw ka Ri-loom Jaiñtia nadooh ki luti syngkieñ, ki wah, ki yung ki sem, ki thaw rep thaw khih wa kiwi.
Ha Jowai da sakhi yei oor khyndaw ha Caroline, ha Mynthong, hei bynta u sarok Salaroh, Dulong College Road wa kiwi kiwi.
U sarok da dap u da i khyndaw ha Salaroh hadooh wym lait de ki kari wow lai.
Ka Wah Myntdu leh da chlai ko heiwa da dap um lut ki hali ha Pynthor Wah (Treriat) wa ha Pynthor Neiñ (Yingkieñ Myntdu) hadooh wa da kyllep wa ki stiar hali.
Da oor leh i khyndaw hei bynta u sarok Jowai-Amlarem uwa dang dep chna, tangwa wym em thut won i lai i wan katwa da heh u sarok.
Ha Mynthong najrong i chah ktah ka skur Q.C. Springside HS School hei oor khyndaw, i yung yong ka Warless Kassar ha Riatsiatsim leh da chah ktah i hei oor khyndaw iwa da jia ynne i step heipor kamwa 6:00 waje. Katkam ka yutip da ong wa heini i oor khyndaw ha yung ka Warless Kassar wym em iwon iwon i mynsoo bru lait noh i piah i pra i kynroh waka Gate.
Ha chnong Tangnub wa em hajan Sutnga hapoh ka Saipung C&RD Block da em ar tylli ki yung kiwa em hei maa nei oor i khyndaw wei kini ki yung toh ki yong ka Piousfull Lamare wa i yong ka Dinivonhi Sutnga.
Da ong wa ha kini ki yung i khyndaw da tooid i wei da rong i leh ya i paikhana wei embhah ym em iwon iwon i jia wa sñiawsih.
Da chah ktah leh ka thaw uiñke suwari wa pawnaam ka Ri-loom Jaiñtia, ka Shnongpdeng heiwa ka wah Mynngot da chlai ko chadooh ki thaw sah ki bru.
