Ka seiñ Jaiñtia Coal Owner Miners & Supplier Workers Association (JCOMSWA) da paan bor ko na u DC ka East Jaiñtia Hills District yow pynman yei chah thngan ha pchem ka yung krehkaam u DC hi hajan u mot u Kiang Nangbah.
Da ong wa yeini i chah thngan u pynman neibynta i eh i khoo wa da maad da ki tre paar mooyong, kiwa khayi mooyong, kiwa kamai deilang kiwa kreh mylla kiwa da em da ki hajar tylli ki manyung kiwa da dooh khih hadien wa chah khang u mooyong.
Da kular leh wa kani ka yakhih u man ko kawa jai-jai khlem da pynthut ya ki paidbah.
Da booh tarik wow sdang yei chah thngan nadooh ka 1 tarik June 2026.
Ka JCOMSWA dadep yachem ko leh wa u CEM ka JHADC, yow khana hadooh katwon da chah ktah da palat 10 snem nadooh wa chah khang u mooyong deiwa ong wa wot ka Supreme Court ka India da ong ko wa ki mar pohkhyndaw toh kiwa mantre da ki jaitbru wa em hapoh ka jylla.
Tangwa neidaw i long i man ki aiñ wei deiwa emkaam wow yada ya ka rymaw, da ki hajar tylli ki manyung da dooh ki yei khih i khan ki wei ym ye de ki wow kyrchaan ya ki khon ki kti ki.
Da ong leh wa ki kyndon aiñ da man ki kiwa eh ya ki tre thaw tre paar wow bood ki wei lada khih khlem da bood kyndon da ong wa man ko pyrchah ya ka aiñ.
Kamtæ da kyntu ya ka JHADC kam kawa pait yei khyndaw u chyiap wow pyntikna wa ki aiñ toh u man ki kiwa yatoh wa i rukom mantre ya ki thaw ki bhaw wei wow ya krehlang wa ka sorkar jylla deilang ka sorkar pyrdi yow wai laad ya ki tre thaw wow khih mooyong katkam ka aiñ deiwa yada leh yei hok ki.
Da ban joor leh wa ini ym em mut wow tih mooyong biang kam ki por wa nachwa tangwa deiwa chngaaiñ deiwa man Scientific wei iwa emkaam dooh toh deiwa emburom wei ka JHADC ye ko wow leh yeini wow yada yei hok ki tre chnong deiwa pynkhai im biang yei khih mooyong.
Discussion about this post