U Montri ka sorkar pyrdi uwa pait ya ka Coal and Mines, u G. Kishan Reddy da klam u heiyatoh wa iwa jia ha East Jaiñtia Hills District deiwa ong wa hadooh katwon man iwa pynsñiawsih ya oo wow tip yeiwa khlaad kiwa boon ngut ki bru.
Da ong u wa ka Ministry of Coal da yaklam ko wa ka sorkar Meghalaya yow pyntikna wa ye wow pynlait im smat ya kiwa dang sahkut.
Da phah u leh ya ka Ministry of Coal wow paan ya ka Report wa bniah na ka sorkar jylla wei wow pynbahkhlieh yow lait biang kam ini wow jia.
Chooh chooh da ong u wa ka sorkar pyrdi neipor cheipor da klam ko chaphang i tih mooyong pyrchah aiñ neibhah da pynlai ya kini ki kaam da ki bru wa im cha baar ka aiñ wei kiwa kreh toh ki wym tip iyi iyi chaphang ini wei da kyntu u leh ya ka sorkar Meghalaya wow pynsangeh ya ini waroh i tih mooyong pyrchah aiñ khlem da leh chiliang khnang wym jia de kam ini.
Da pyntikna u leh wa man i i tih mooyong pyrchah ya ka aiñ neibhah ka Ministry ym em e bor ko wow tih mooyong ha katai ka thaw wa jia.
Discussion about this post