Ka seiñ Jaintia National Council (JNC) ha ka 13 tarik uni u bnai da yachem ko ya Montri sorkar, u Kyrmen Shylla uwa man leh u MLA ka Khliehriat yow pynsñiaw yei pyrchah joor yei thmu ka sorkar wow wanrah luti rel hapoh ka East Jaiñtia Hills District kamjooh yow paan pynche na u Montri yeiwa klam u Montri Rangbah ini wa dep hajrong ini.
Ka seiñ da ong ko wa u pyrchah bait ko lada ka rel man ko wow kit mar leh kamjooh kiwon kiwon ki jait rel.
Neiliang u Kyrmen da kular u ya ka seiñ wa oo deilang waka MLA ka Sutnga-Saipung, ka Santa Mary Shylla daw yachem ki wa waroh yow yaklam hajrong ini i kaam wei yow lai paan pynche na ka sorkar.
Ka seiñ da ong ko wa ki daw wa pyrchah toh wym yoh myntoi kiwa chong chnong nei wan ka luti rel lait noh kitu kiwa na baar ka jylla neibhah lada wanrah ya ki jhoor na baar jylla daw ktah ko ya ki warep kamjooh kiwa khayi jhoor wa em hapoh Jaiñtia Hills wa kamjooh kiwa na Khasi Hills.
Chooh chooh da ong wa ka luti rel daw pynmyntoi ko du ya ki karkhana wa em ha East Jaiñtia yow kit moochuni wei kit mooyong wei ini daw ktah ko leh ya ki bru yong i kiwa kit ya kini ki mar wei lada poi du ka rel wa kit mar leh, ki bru leh khlem artatien daw poi lang ki chapoh ka jylla.
Da kdaw leh yei wym krehkaam ki Infiltration Check Gate kiwa da em ha ki sarokbah neibhah ki bru yoh ki u psiah u mih katwa ngait ki wei deiwa wan ka rel ini waroh daw joor chooh chooh i.
Kamtæ da ong wa ka aiñ wa da mynjur da ka sorkar ha u 2016 kawa tip kam ka Meghalaya Residents, Safety and Security Act (MRSSA) ym ye wow pynkrehkaam ka hadooh katni wei ym boi pyrkhat hi ya ka ILP kawa daw emkaam u yoh bor naka sorkar pyrdi yow pynkrehkaam ka, kamtæ emkaam chwa ya ki aiñ wa khlan.
