Jowai: Ki 3 tylli ki seiñbhalang kiwa kynthup yaka EJNC-Central Executive Council hapoh i yahkhmat yong u Sambormi Lyngdoh, HANM-East Jaintia Hills hapoh i yahkhmat u Ency Shadap, JSM-Central Body hapoh i yahkhmat yong u Deijuhi Siangshai, kam chibynta wow booddien wei wow yoh yei pynche hajrong ka Auction Challan, ynne ka sngi da lai ki wow yachem ya u FM Dopth, Deputy Commissioner, yong ka East Jaintia Hills District, yow paan pynche ya i dai syad dor palat yaka Auction Challan.
Hawa yaklam wa kiwa yahkhmat yong ki 3 seiñ, neiliang yong u DC da pyntip u wa yaka Auction Challan da yoh da uwi u bru samen wa tip kam u Erantis Sympli, hawa kylli yaka rukom e Tender ya kitai ki Auction Challan, neiliang yong u DC da ong u wa ym em ka yutip wa bniah ya katai ka kaam wa da leh lut da u Sainpyniar S Syiemlieh, ADC EJHD neidaw wa ha katu ka por u DC dang em Training u cha baar.
Hawa paan pynche hajrong katai ka Auction Challan neidaw wa boon na kiwa khayi dang sah ki hei doom, neiliang yong u DC da pyntip u wa kitai ki Challan da pyllait kyrpang du neibynta wow kit namo Transport ya u mooyong wa da chah kem haka sorkar wa ya utu u mooyong wa ym em tre ym toh neibynta wow dai yaw cha ki paidbah.
Ha i jooh i por neiliang yong u DC da kular u wow khut ya u Erantis Sympli wow yaklam hajrong kani ka phang.
Kawa da pynsñiawphylla ya ki seiñ toh wa kammon utai u bru samen nood u wow dai yaw ya kitai ki Auction Challan ha i dor wa syad, wei da suba joor leh wa em iyi iyi i baamtooh wa joor bha cha kylla.
Kamtæ hajrong kani ka yurim, neiliang yong ki 3 seiñ ki kyntu ki yaki paidbah wa khayi mooyong wa ym toh u thied ya kitai ki Auction Challan kam ka dak wow pyrchah yaka baamsap hapoh ka District.
Discussion about this post