Shillong: U Chief Executive Member ka Khasi Hills Autonomous District Council, (KHADC), u Titosstarwell Chyne da pyntip u wa neiliang u Montri Rangbah, u Conrad K Sangma da pynche u wa ka sorkar ym kwah ko wow ksoh ya ka ‘Tied Grant’ kawa toh i hok yong ki District Council, deiwa pyntip leh wa i ksoh ya katai ka poisa toh neidaw em kajiak i thut, neibhah wa kani ka poisa kamwa da phah da ka 15th Finance Commission toh wow pynkrehkaam du neibynta ka ‘Sanitation’ wa ‘Water Supply’.
Ynne ka sngi neiliang ki MDC ka United Democratic Alliance (UDA) wa em ha ka liang synchaar ha KHADC, hapoh i yahkhmat u CEM da lai ki wow yachem ya u Montri Rangbah yow paan pynche hajrong ka bhah wa toh u yoh da ka KHADC kawa man T. 45.5 klur.
Da ong u wa kani ka poisa kawa toh u wan na ka Ministry of Jal Shakti kawa wan deilang wa ka Scheme Jal Jeevan Mission, neitæ i daw em i thut kajiak wow pynlait ya ka poisa. U CEM da pyntip u leh wa neiliang u Montri Rangbah dang paan pynche u na ka Ministry lada ye næ ym ye u pynlait cha ki ADC.
U Titos da pyntip u wa neiliang ki MDC da kyntu bait ki ya u Montri Rangbah wa ya ka poisa wa da mang neibynta ki District Council toh u e bait ha ki ADC wow leh ya i kaam. Da pyntip u leh wa ha ka tayaw wow wan daw em ka yalang hapyrdi ka KHADC wa u Mission Director ka JJM wa ka chnat muna tyngka khnang wow ye u pynbait ya i eh.
U CEM da pyntip u wa neiliang u Montri Rangbah da kular u wow chimkhia wa kani ka poisa kawa toh hok yong ka KHADC toh u pynkrehkaam bait da ka Council.
