Ka Synjuk Waheh Chnong ka Iooksi wa Saphai deilang wa ka KSU Kupli Area Circle da lai yachem ki wa u Montri ka chnat Khloo wa Rymaw, u James Sangma yow paan yarap yow pynim biang ya ka wah Kupli.
Ha ka chithi wa da e cha u James da ong wa ka wah Kupli toh kawa da chah ktah bha neidaw wa wan i bih wei da yap ki dakha man-i-por kamjooh da kylla rong kani ka wah iwa da ktah bha ya kiwa chaniah wa kiwa im harood kani ka wah kamtæ da emkaam wow pynim ya kani ka wah.
Da ong leh wa kani ka wah toh ka thaw uiñke suwari wa pawnaam wei nachwa kani ka wah toh kawa e khih e khan ya kiwa boon kiwa chong chnong kiwa khwe dakha, kiwa kiñ lieñ wei em leh ka kchaaid Ialei kawa da em i parom yong uwa rim wa jah kawa da wiar nadooh wa chna Dam ka NEEPCO.
Da em leh boon ki thaw kiwa da chna pynmiat da ki bru samen kamjooh ki yong chnong yow man kam ki thaw uiñke suwari tangwa kat wym pu ye u pynkhooid ya kani ka wah wei kat wym pu ye u im biang ki dakha da chem chitom wow man kini waroh kiwa jop.
Da kdaw leh wa ka sorkar da pynlut ko T. 11 klur yow pynmiat ya ka Iooksi Kupli Park kamtæ da emkaam leh wow pynim biang ya ka wah tangwa hadooh katni ym pu em leh iyi iyi wow pynim biang ya kani ka wah.
Kamtæ da kyrpaad wow e bhah ka poisa napoh ka Meghalaya Environment Protection & Restoration Fund (MEPRF) yow wanrah biang yei naam ka wah kam nachwa deiwa kyrpaad leh wow thooh laad yow pynsangeh yei poi i bih i jakhlai cha kani ka wah.
