Jowai: Haka yalang paidbah wada pynman ha chnong Jalaphet Bri Sutnga East Jaiñtia Hills District, ynnin ka sngi neibynta u ap yei sur u paidbah hei yatoh i e NOC u waheh chnong wow chna kharkhana thang mooyong hapoh chnong khlem i tip ka dorbar chnong, neiliang u waheh chnong u W. Chyrmang da pdiang u yei bakla wei da paanmap u hakhmat u paidbah wa boon deiwa ong “Hei man bru boon i bakla wei nga wym poi pyrkhat o wow jia hadooh katni, tæ lada phi hi ki paidbah wym hunlang phi nga smat O wow yakrehlang neibhah ya nga leh toh phi hi wa jied”.
Da pynrap haroh u deiwa ong, kani toh i sneiñ ya nga yow chemphang yaka shynchaar khadar hapoh chnong wei yooluti O wa neini chakhmat kamwa angnood o wow wanrah yei suk wym hoi de u mih kam kani ka awri awra.
Heijooh i por kyntu u ya ki wa pynlai ka karkhana næ u tre yong ka uwa man u khon ka chnong hi wow ya kohngooh lang waka sur u paaid wa boon wa lang ka dorbar chnong.
Neitæ haka kynta e yumut paidbah wada e laad da u Chairman chnong u Basterwel Bareh hajrong i thmu wow chna ya kani ka karkhana ha kani ka chnong, ka kynhun kiwa pyrchah da ong ki wa lada kani ka kharkhana poi ko, daw ktah ko yei chait i khiah u paidbah, ki mar rep, ki umbam umdih wa kiwi, neibhah daw pynmih ko yaka tdem ka wow ktah yaka la-ær wa i riñ pynhiar mynsien i.
Sa iwi leh ong ki neidaw wa em ko pynhapoh chnong wei hajan yong ka daw chna ya ka yungskur kamtæ da dawa ki wow kyrriah yaka.
Katwa neiliang kiwa kyrchaan da pynsñiaw ki yei myntoi wa ye u yoh na kani ka kharkhana deiwa ong, kani wai laad ko ya ki khon ka chnong hei yohkhih yohkreh khamtam ha kini ki sngi wa jynjar i yohkreh wot hadien wada pyndep yei puræ.
Hei yatoh yei ong wa daw ktah ko ya ka rymaw da pynche ki wa neiliang ka kharkhana leh hap ko wow bood ya ki aiñ ki kyndon wada booh daka sorkar ym toh wow leh katwa ngait, tangwa u kreh heitæ i rukom wym chah ktah ka rymaw wei heijooh i por u pynku ko yei ioh i lang.
Neitæ da kyrpaad ki wa hawa em ki khon ka chnong wa kwah seiñ khih hapoh chnong toh u e mynsien ya ki, tangwa kamwa da ong wada jan ware ko ha chnong, toh u pyrkhat won se deiwa booh kyndon yei jngai.
Hadien i ya phyllu yumut da rai wow yachong bichaar wei pyrkhat sani bha, neitæ yow pynman biang ya ka yalang neibynta u chim ya ka rai wa khaddooh.
Kiwa wa e yeiklam ha kani ka sngi kynthup u Hamris Chyrmang Assistant waheh chnong Jalaphet Bri Sutnga, u Suklang Bareh waheh dong Muchut Pyrdung, u Bio Dkhar Secretary Chnong Jalaphet Bri Sutnga, Ex MDC Hopingstone Bareh, u Shai Chyrmang wa kiwi kiwi.
U tre ka kharkhana thang mooyong toh u Tailing Chyrmang uwa naka chnong Jalaphet hi wei da thmu u wow chna hei thaw watip kam ka Khlieh Mooiong. Yei pynkreh da sdang neibhah da dep loor pynmadan yei thaw wei i pynhiar ya ki tiar ki tar da lai i chakhmat.
Discussion about this post