Uwa yasaaid aiñ wa pawnaam ka jylla, u Vivan G Kynta da maham u yaki paidbah nadooh ki khynroo khyllood hadooh kiwa da heh wym toh u muja ki ya ngat ki hei saja.
Yeini da ong u hawa kylli yei chah dai sarom kawi ka kynthai ha kiwa slaitbor ka kiwa da pynpoor leh ya ki Video ya ini i kaam wa da leh ki.
Hawa klam wa kiwa thoh khubor da ong u wa ka kynthai wa jia ini yaka em hok ko wow yasaaid khooid hakhmat kiwa thoh khubor heijooh i por da ong u wa iwa thoh ki bru pyrchah yaka man i iwa da palat wei ki pulit toh u ujor ki da ka aiñ pyrchah ya ki.
Heijooh i por da ong u wa kitu kiwa pynpoor ya ki Video yeiwa jia ya kani ka bru i pynchitom toh deiwa joor wot hadooh wow chah kset waroh chi rta. Ka kyndon 376 ka Indian Penal Code toh kawa khor bha kawa phah pynchitom deiwa joor wei hadien da wan sa ka aiñ Protection of Children from Sexual Offences Act (POCSO), 2012 hadien i jia ha Delhi heiyatoh waka Nirbhaya Case. Hawa yatoh waka POCSO da chong ha uwa chah pynbaad wow pynyoo wym em leh bakla u.
Kitu kiwa pynpoor yei Video wei kiwa leh yei kaam toh u ngat ki hapoh ka Section 376, kamjooh haka 499 wa haka 500 IPC neitæ ka 66E ka IT Act 2005, kawa da khang wow pynypoor yaki Video khlem da yohbor wei daw chah kset ki 3 snem deilang waka kuna ka Rs. 2 lak.
Da ong u leh wa kini ki khynnah daw ngat ki haka bichaar wa khor bha wei da emkaam yaka sorkar wow thung da ka Fast Track Court yow bichaar ya kini ki kaam khnang yow kdoh u khoom ya kini ki kaam sih wei wow pyndep yei bichaar hapoh 6 bnai.
Chooh chooh da ong u wa ki pulit neini chakhmat hawa yoo næ sñiaw ki ya kawon kawon ka khubor kawa tngit ha Social Media toh u chim ki dei bor yong ki hi wow ujor.
Da maham u leh ya ki bru wym toh u muja yoh saja pathan, wei da kyntu u leh ya ki paidbah waroh wow kiar na kini ki kaam khlem sarom deiwa pynsih yei im ki bru.
Kam wow pynkynmoo wa da em soo ngut kiwa da chah kem hadien wa kawi ka kynthai da ujor FIR ko pyrchah ya kiwa slaitbor ka.
Discussion about this post