Jowai: Ka chnong Saba wa em ha West Jaiñtia Hills District kawa haap hapoh ka Laskeiñ C&RD Block, toh kawi naka chnong wa em haki thaaiñ khappood waka jylla Assam, hanla man ka chnong wa em palat ya 200 tylli ki manyung leh, tangwa hadooh katni dang chong ki hapoh i doom yong ka miet neidaw waka bordiñ yoh ki teiñ khat wei kattu da palat 10 snem wym em de yoh ki ka.
Hei yaklam wa kiwa yahkhmat ka chnong Saba khana ki wa yaka bordiñ da yoh ki ha u snem 2005, tangwa wiar noh ko du chipor wot tang chi snem leh wym dap, nalor hawa che ko leh tang u pynemkaam ym pu yoh bha, pleh pleh wot ko.
U waheh chnong warim ka Saba u Roming Suchiang khana u wa hei lai luti yong oo neibynta ka bordiñ, neipor cheipor da lai yachem u ya ki bor wa toh u pait yow kyrpaad pynyoh bordiñ ha kani ka chnong tangwa kut ko du hei boohteiñ hanla da kular ki wow pah bru.
Hadien i pteiñ yong oo wow yachem wa u Engineer ka chnat bordiñ neibynta u pynsñiaw yei eh i khoo ka chnong ha kiwa boon ki liang khamtam hei puræ puthi ki khynnah skur, neitæ manda pait ki yaki kot ki sla tip wa em 56 tylli ki manyung BPL kiwa sah bai bordiñ.
“Hawa bichaar da chem wa i kheiñ yaka bai bordiñ lai bait ko hanla ym em yoh bordiñ, kamtæ hajrong kani ka yurim da kyrpaad O yaka chnat bordiñ wow su chiteiñ yaka bai bordiñ wei kular leh kam ka chnong u leh chitom ko u su yeiwa toh hok u su,” khana u R. Suchiang.
Kamtæ neidaw wa kwah ware ki u yoh bordiñ, da chah chitom bait ki u su yaka bai bordiñ wa mar chiteiñ, wei dei ya burom kylliang napyrdi ki yung BPL leh boon hi da dep su ki katwa iwa sah won da su kajiak kajiak katni.
Hajrong ini da ban joor ki yaka sorkar wow pynyoh yei hok bordiñ, wei ong ki leh wym toh u yoobeiñ wa sah ki cha khappood, neibhah wot ka chithi leh da dep phah wei yaka bai bordiñ wa dang sah sa kajiak leh kular ki wow su pyndep.
“La heini i rukom i leh ka sorkar, mynstep mankawi daw man i bood naam yaka chnong neibhah wa daw sarah ki chrot bordiñ, ki sainar bordiñ wei daw jæd daw pra ki neidaw wym em wa pait wa yoo. Lada ka sorkar ym ye ko u e yei hok yong i, toh u pynlum pynlang noh ko yaki tiar ki tar khnang waka chnong ym bood naam ko,” pynrap u Roming Suchiang.
Heiyatoh wa ka bordiñ wow pynyoh won wada mang daka sorkar bei neibynta ki yung wa dooh, neiliang u Acting Waheh Chnong u Damehi Lathong da khana u wa da em ki wakreh ka chnat bordiñ wa wan poi ha chnong yong ki wei da chna Meter kheiñ bai bordiñ ha kiwa boon ki manyung, tangwa kattu da boon bnai ym de wa wan ki.
Heijooh i por pyntip u wa neiliang ka seiñ ki 5 chnong kani ka thaaiñ da lai mih ki cha yung krehkaam ka MeECL ha Khliehtyrshi wow yaklam neibynta ka chnong Saba, heiwa da kular ki u sylli hadien wa rang ka pyrthai tangwa hadooh katni ym pu em yoo ki iyi iyi.
Chooh chooh u Damehi Lathong khana u wa neiliang ka chnong hadooh katni dang yaleh ko u pynlum pynlang yaki chrot bordiñ wa oor wa haap, wa tieñ ki ya em wa chim kabu.
Neitæ khana u wa kam ka chnong da pyrchang yaklam ki wa ki paaid ka chnong wow su pyndep yaka bai bordiñ wa sah sa malu mala, wei ki leh da kular ki lada wan ka bordiñ u su pyndep hi ki thij neini chakhmat.
