U Chief Secretary ka jylla Meghalaya u M.S. Rao da pynbna u ya ki kyndon heiyatoh wa i lehkmen Christmas waka lehkmen snem thymme.
Da pyntip wa ya kini ki kyndon da pynbna hadien wa da dep wow ya syllok wa kiwa emkti ha kini ki kaam.
Neiliang ka sorkar da ong ko wa ki bru kiwa em 65 snem chaneiñ, kiwa da em chwa yei chitom, kiwa punkhon wa ki khynnah wa hapoh 10 snem toh u neh ki ha yung.
Heiyatoh wa i pynman yaseiñ wa yatoh waka Christmas wa u snem thymme wa kynthup yaka yaseiñ chiteiñ synyaw, ye hi u pynman deiwa bood yaki kyndon wa da pynmih daka Home (Political) Department ka sorkar jylla kawa da pynmih haka 25-09-20.
Yei pynman yaseiñ toh u pynman deiwa yabhah kajiak chisien pynman.
Ki yaseiñ kiwa pynman ha pchem ki yungmane chah hi wow pynman tangwa ym toh wow em palat 200 ngut ki bru.
Heiyatoh won wow pynman yaki Carol lane ki Procession, toh u pynman ha pchem ki yungmane lane ki thaw wa da jied deiwa bood yaka Social Distancing katkam ka kyndon sorkar wa da pynmih daka Home (Political) Department ka sorkar jylla haka 25-09-20.
Ym em pynchlur wow pynman yaki khawai yong chnong.
Yaka Night Curfew yong ka miet ka 24 wa 25 tarik uni u bnai daw pyndam yaka yow ye ki paidbah wow lai yaseiñ wei ki DC daw pynbna ki ya ini.
Ya waroh ki yalang wa yatoh waka Christmas waka New Year daw hap paan bor chwa na jar jiar ki DC katkam ka kyndon wa da pynmih daka Home (Political) Department ka sorkar jylla kawa da pynmih haka 30-11-20.
