Hadien ar snem wa da pynlait ya ki khynroo khyllood ka jylla u yakhun ya ka Common University Entrance Test (CUET), ynne ka sngi hei sien wa nyngkong da pynman ya kani ka Exam neibynta kiwa thmu wow puræ ha ki kyrdan wa rap chaneiñ ha ki skurbah wa em ha kylleiñ ka ri India.
I pynman ya kani ka Exam hapoh ka jylla da pynman ha ki 26 tylli ki Centre wa da booh da ka National Testing Authority (NTA) wei kini ki thaw thoh Exam da em ki 12 tylli ha Shillong, 5 tylli ha Jowai wa 9 tylli ha Tura.
Waroh da em hadooh 18,422 ngut kiwa da thap pyrtuid wow yakhun ya kani ka CUET, wei na kini da em 8535 ngut wow yakhun ha ki Centre ha Shillong, 4269 ngut ha Jowai wa 5618 ngut ha Tura. Ya ka Result won daw pynbna ha ka 30-06-24.
Ya kani ka CUET da pynman da ka Online wa Offline Mode-Computer Based Test (CBT) wei kamjooh deiwa thoh.
Kani ka Exam kawa da pynman ynne ka sngi daw pynman biang ha ka 18 tarik uni u bnai kawa da ka Offline Mode, katwa ka Online Mode da booh wow pynman ha ka 21, 22 wa 24 tarik uni hi u bnai.
Kam wow pynkynmoo wa ha ki ar snem wa dadep, ka NTA ym em pynman ko ya kani ka Exam ha Meghalaya hadien wa ood wei kyrpaad ki khynroo khyllood deilang wa kiwa boon heiwa neiliang u Montri Rangbah ka jylla, u Conrad K Sangma da thoh u cha ka NTA wa cha ka sorkar pyrdi wow pynlait ya ka jylla na kani ka CUET kat wym pu ye u pynkhreh ya ki thaw pynman Exam.
Discussion about this post