Neibynta i bha i miat ki paidbah wei wow pait leh wym ku dor ki mar, neiliang u Deputy Commissioner ka West Jaiñtia Hills da pynmih hukum u cha waroh kiwa dai yonglang (Wholesale) wa kiwa dai khutia (Retail) kiwa em ha ki yaaw ki haat hapoh ka District wow bood ki ya ki kyndon wa da pynmih da ka Directorate of Food Civil Supplies & Consumer Affairs ka sorkar Meghalaya chisiendon.
Waroh kiwa khayi kamjooh kiwa dai dukan toh u booh ki dei thoh deiwa chynna bha ki bru yei dor ki mar Wholesale wa Retail kiwa man ki mar wa pynemkaam man-ka-sngi yow tip ki paidbah.
Kani ka hukum da khang ko leh yow dai Black, u murieh ya ki mar da ka thong wow pynku dor ya ki mar wa emkaam deiwa dai palat yei dor wa da booh ka sorkar.
Da maham leh wa daw pynchitom ya kiwon kiwon kiwa dai da ki mar kiwa da sih ki wym em man katkam ki kyndon wa da booh da ka Food Safety and Standards Act, 2006 wa kiwi de ki kyndon.
Da phah leh ya kiwa dai wow krehlang ki wa ki bor District wa ki bru ka Food Civil Supplies & Consumer Affairs Department deiwa booh yukheiñ thij-pa-thij nadooh ki mar wa em namo ka Stock, ki kot ki sla wa pynyoo yeiwa thied ki manda emkaam wow pynyoo.
Ka hukum da phah ko leh wa hap wow bood ya ki kyndon wa da pynmih neipor cheipor hapoh ka Price Monitoring System neibynta ki mar wa emkaam yow im.
Lada chem ya ki wym bood katkam ka kyndon ka Essential Commodities Act, 1955 wa kiwi de ki aiñ, ye ki wow chah pynchitom katkam ka aiñ, u chah kem ki mar ki wei wow pyndam ya ka Trade License.
Da kyntu leh ya waroh ki Market Committees, ki Dorbar Chnong wa ki Trade Associations wow lai phah Notice cha ki dkhot yong ki yow pyntikna wa bood ki yeiwa emkaam.
Kani ka hukum toh kawa krehkaam chisiendon.
Discussion about this post