Ha ka yalang wa da pynman ynne ha Thadlaskein, da em palat 200 ngut kiwa kyrchaan Congress wa VPP kiwa da psiah cha ka National People’s Party (NPP) deiwa sakhilang u Symbood Montri Rangbah ka jylla, u Sniawbhalang Dhar wa u MDC, u Jesse Suiam.
Kiwa da wan wow psiah cha ka NPP da pynsñiaw ki yei chaniah ha ka Party yei yahkhmat ko kamjooh deiwa yoo ya ki kaam pynroi yong ka sorkar wa yahkhmat ka NPP.
Hawa pdiang ya kini ki spah ngut kiwa wan psiah, neiliang u Siawbhalang Dhar da ong u wa da pdiang u da u dohnood wa kyllooid wei da pynsñiaw u leh yei sñiawngooh wa khroo hajrong i chaniah yong ki wow psiah cha ka Party.
Da kular u leh wa ka Party daw pteiñ ko wow kreh ryngkat wa ki paidbah deiwa pynlut bor ha ki kaam pynroi ha waroh ki liang yow pynyoh myntoi wei wow pynku chaphrang ya ka Constituency wa ya ka jylla hi waroh kawi.
Neiliang kiwa psiah cha ka Party da ong ki wa da sakhi ki ya ki kaam wa bha yong ka sorkar wa i rukom kreh chitom u Sniawbhalang Dhar wei ka NPP leh ko boon da ki kaam wei pynduna ko yei klam.
Uwi won da ong u wa ngait u wa u Blai u nang e chooh chooh u ya u Sniawbhalang Dhar yei bor wow nang pteiñ u wow kreh hok neibynta i bha i miat yong ki paidbah.
Deiwa wan psiah kini, da pynkhlan chooh chooh ko ya ka NPP hapoh ka Nartiang Constituency deiwa nang boon chooh kiwa da pynyoo yei chaniah yei yahkhmat wa ki kaam pynroi ka Party.
Discussion about this post