January 4, 2023
Katkam wa pyntip u Chief Electoral Officer ka Meghlaya wa hadien wa dep u leh ya ka Electoral Roll lyngba ka Special Summary Revision u 2023 kawa daw pynbna ha ka 5 tarik uni u bnai, da em 63,763 ngut kiwa thap Vote wa thymme. Tangwa hadien wa da dep bichaar ya ki ujor ya kiwa da psiah pyrtuid, kiwa thap Vote thymme da em noh ki 49,915 ngut.
Kamtæ kiwa thap Vote hapoh ka jylla da em ki waroh 21,61,129 ngut heiwa na kini da em ki chynrang 10,68,801 ngut, ki kynthai 10,92,326 ngut wa 2 ngut ki Transgenders. Da em leh ki 3844 ngut kiwa man kam ki Service Elector.
Da em leh 13,848 ngut kiwa da chah pyndam pyrtuid kiwa da khlaad noh wa kiwa da yut chnong cha baar ka jylla wa kiwi de ki daw.
Da em leh 40,700 ngut kiwa da pynbait hawa yatoh wa i bakla hei pyrtuid, i thaw sah wa kiwi kiwi.
Kam chibynta wow pyntikna waroh em pyrtuid ki kam kiwa thap Vote, ki bru wa em i duna hei doh i pran namo ki People with Disabilities (PwDs) da em ki 7478 ngut.
Hawa nujor wa u snem 2018, kiwa thap Vote da ku ki da 18% deiwa em 4,29,062 ngut kiwa thap Vote thymme kiwa da thap pyrtuid thymme nadooh u 2018.
Ki Polling Station leh da ku na 3083 tylli ha u 2018 cha ka 3482 tylli.
