Ka sorkar Meghalaya wa sorkar Assam ynne ka sngi da chong ki ya ka Joint Meeting kawa da neh hadooh palat 3 kynta yow pyndooh pyndam noh yei yakhih wa i eh i khor hapyrdi kiwa yakhih ha waroh ar tylli ki jylla kawa da lai kattæ cha ka sngi wa le hadien wa mih kulmar ha ka 19 tarik ha Shillong.
Ha kani ka yalang wa da pynman ha Koinadhara State Guest House, Khanapara, da yahkhmat ya ka Meghalaya da u Symbood Montri Rangbah uwa pait ya ka chnat Transport, u Sniawbhalang Dhar wei ya ka Assam da yahkhmat da u Montri ka chnat Border Protection and Development, u Atul Bora deiwa emlang ki Chief Secretary na waroh ar jylla wa kiwi de ki heh sorkar deilang ki pulit.
Heiyatoh wa i chah khang ki kari wow psiah u mih hapyrdi ki ar jylla, u Sniawbhalang Dhar da pyntip u wa ka sorkar Meghalaya da ye ko wow synran kamwa 400-500 tylli ki kari hadien wa da mih ka yakhih deiwa khang ya ki kari ha sarok NH-6 Shillong-Guwahati.
U Sniawbhalang da pyntip u leh wa ha ka yalang ki ar sorkar, da rai wow chna da ka Joint Committee on Tourist Transport wow emlang ki dkhot ki Tourist Association neibynta u pynpoi suk ya kiwa lai wa wan cha ki ar jylla, wei da rai leh wa ka sorkar Meghalaya daw chim ko yei kitkhlieh neibynta i chngaaiñ kiwa wan uiñke suwari cha Meghalaya.
U Sniawbhalang da ong u wa i pynman ya ka yalang toh yow wanrah biang yei jai-jai wei da kyntu leh ya ki paidbah na waroh arliang wow ya krehlang khnang wa i suk i saaiñ wa i jai-jai daw wan uiñ biang i hapoh ki kajiak kynta.
Discussion about this post