Ka Directorate of School Education & Literacy (DSEL) ka sorkar Meghalaya ini wa dep da sdang ko hei sien wa nyngkong ya ka thong wow booh da ki kpær ha ki skur kawa tip kam ka School Nutrition Kitchen Garden (SNG) wei da jied leh ya kawi ka sngi ka wym hap rah muna cha skur haka 29 tarik u bnai wa dep yow leh ya ki kaam thung jhoor ha kini ki kpær heithaw wow chong hapoh ki kamra skur.
Kani ka thong toh yow em kini ki kpær ha waroh ki skur yow pynemkaam leh da iwa mih na kini ki kpær hawa e ja ha ki skur hapoh ka PM POSHAN kawa jooh tip kam ka Mid-Day Meal.
Neiliang u Director ka DSEL, u Swapnil Tembe hawa pynche ya kani ka thong da ong u wa deiwa em kini ki kpær ha ki skur daw yarap ko wow e ja da iwa em ki jhoor wa tei yei doh i pran ki khynnah wei yow pynmyllien leh u baam da ki jait baam wa pynchait pynkhiah. Chooh chooh da ong u wa deiwa chimbynta da waroh wow thung wei sumaar ya kini ki jhoor daw wanrah ko leh yei ya krehlang kamjooh u sñiawthooh wei u tip ya ki jait jhoor.
Ha ki skur wym em thaw wow booh da ki kpær, da phah wow thung ki ha ki kchu syntu wei da phah ya ki SDSEO wow ya krehlang ki wa kiwi ki chnat sorkar heiwa ka chnat Horticulture waka Krishi Vigyan Kendra (KVK) da wan ki chakhmat wow e chyieñ wa ki symbe.
Ha kiwa boon ki skur da wan leh wow chimbynta da ki bei ki pa kamjooh ka imlang sahlang hadooh wow kær ya kini ki kpær.
Nadooh wa phah wow sdang ya kini ki kpær da ye wow sdang 3000 tylli iwa mut nachwa ha waroh ki skur da em du 9% kini ki kpær ha u 2023, tangwa kattæ da em 40% iwa dang ku katwa dang lai ki sngi wei daw yaleh wow poi cha ka thong kawa 100%.
Discussion about this post