Shillong: Kiwa yahkhmat seiñbhalang CoMSO ynne ka sngi da chah khut hajir ki ha ki pulit ha Sardar Police Station hajrong i yahkhmat ki wow pynman ya ka yakhih pyrchah ha ka 13-12-19 hakhmat ka khyrdop yung u Lat ka jylla, ya i pynman aiñ ka sorkar pyrdi ya ka Citizenship Amendment Act (CAA) 2019.
Hadien wa da dep chah kylli hapoh Police Station, u Donboklang wa u Lamphrang da klam ki cha ki laad pathai khubor, heiwa da pyntip ki wa da chah kylli ha ki pulit ya kiwa boon ki phang kylli wa ki da pynman ki ya ka yakhih pyrchah ya ka CAA. Da pyntip wa ki pulit da kylli ki chaphang kammon yoh bor ki wow lai Rally, kiyi wa kyrchaan poisa, kiyi wa emkti ya i thang kari sorkar, i kawang moo, i dat ya ki baar jylla wa kiyi wa sdang nyngkong ya ka pynkulmar ha khmat yung u Lat.
U Donboklang da ong u wa wot hapyrdi i chah pyntieñ tangwa ym pyndem ki neibhah wa hawa chakri ya ka jaitbru, chiliang ka kjat em ko ha u paidbah wei chiliang won em ko ha phatok. Da pyntip u leh wa da pynngat kyndon ya oo hadooh palat 50 tylli ha ki kyndon waphær waphær ha ki 6 tylli ki mukotduma.
Hajrong ini i chah pynngat, kam uwa chakri ka jaitbru da ong u wa khreh wow sap sula koidi wei wow chong ha patok neibynta ka ri wa ka jaitbru. Da ong u leh wa da jooh chah kem u wei ini wa dep ha kani ka yalang paidbah, da lait salit u na u kuli. Kini ki kyndon ym phær ki wei wow pynngat chooh sa kiwi ki kyndon neibhah wa ym em iyi iyi wow tieñ neibynta ka ri wa ka jaitbru. Da pyntip u wa ynne da chah khut hajir ha Sardar Police Station wei mynstep leh da chah khut hajir ha Mawlai Police Station. Da ong u wa neiliang ka CoMSO ym em ko iyi iyi wow pyrchah ya kani ka sorkar wa yahkhmat u Conrad K Sangma neibhah wa ka da jubab wei chimkhia ya i dawa yong ki paidbah.
Katwa u Lamphrang Kharbani da ong wa kam ini i leh man ko kamwa e mynsien neibynta wow yakhun ya ka jaitbru. Da ong u wa i wan yong ki dkhot ha kani ka sngi wow sakhi ya ini i chah khut, man ko wow e mynsien wow yakhun yaka jaitbru.
Discussion about this post