Hapyrdi i sdang ka yakhih ka JSU deilang ki khynnah wym pu em yoh thaw puræ Class-XI kawa da pynman ha laad Kiang Nangbah Government College, neiliang u DC ka West Jaiñtia Hills, u A.K. Singh da pyntip u wa neiliang ka sorkar da leh ko chiboon tangwa neidaw wa ku bha kiwa Pass ya ka SSLC ha uni u snem da chem chitom wow e thaw puræ ya waroh.
Nyngkong da ong u i daw toh kiwa boon kiwa wan na ki chnong wa jngai da kwah bait ki u lai puræ ha Jowai khlem da pait chwa cha ki skur wa em chajan chnong ki wei lada ym em thaw wa lait ye ki wow wan cha Jowai neibhah kamwa man kattæ da boon bha kiwa wan cha Jowai khlem da lai thooh chwa cha ki skur wa em chajan ki.
Da pyntip u leh wa ka sorkar da chimkhia ko yeini i kaam deiwa pynku kyrdan ya ki skur cha ki Higher Secondary wei da em leh ki skur wa sdang ya ki Stream wa thymme deilang ki Morning Shift ha ki skur ki bru samen leh.
Da e nongmuna u ya ka Nongtalang Govt. School kawa da pynku kyrdan cha ka Higher Secondary School kawa em 50 tylli ki Seat neibynta ka Arts wa 30 tylli neibynta ka Science Stream.
Da em leh 8 tylli ki skur ki bru samen kiwa da pynku kyrdan cha ka Higher Secondary nadooh kiwa em ha Mihmyntdu, Dawki, Wahiajer, Shangpung wa kiwi de ki thaw.
Da pyntip leh wa du ha ka Q.C. Springside Hr. Sec. School, Jowai da sdang ko ya ka Morning Shift neibynta ka Arts Stream deiwa em 100 tylli ki Seat.
Ha Govt. Boys’ Hr. Sec. School, Jowai wa ha Sohkha Govt. Hr. Sec. School da sdang leh ya ka Commerce Stream wei ha St. Dominic Hr. Sec. School, Mowkyndeng wa ha St. Mary Mazzarello Girls Hr. Sec. School, Jowai da sdang ya ka Science Stream.
Deiwa kheiñlang waroh ki Seat wa da mih thymme neibynta ka Arts, Science wa Commerce dapoi ki 680 tylli najrong ki warim wa da em chwa kiwa man kamni ha wah.
Discussion about this post