Jowai : Ynne ka sngi 12 tarik ka Kiang Nangbah College da pynman ko ya ka Edu Fest 2016 kam chibynta yow pynyoo luti ya ki khynnah ya ki laad puræ kamjooh ya ki skur puræ wa ye u pynpoi thong yei thmu wa em ki ya ka mynried yong ki.
Da khut pallat 30 tylli ki skur wa ki college na waroh ki ar District ka ri-loom Jaiñtia yow wan chim kabu ki ya kani ka Edu Fest wa nyngkong ha Jowai. Ha kani ka sngi da wan pallat 2000 ngut yow yoh yumut na ki skur puræ wapher wapher wa wan booh dukan ynne ka sngi.
Da em ki skur puræ wa wan nadooh na sor Pune, Mangalore, Guwahati, Kolkata wa kiwi kiwa tyrwa ya ki laiñ puræ kam ki Medical, Engineering, Hotel Management, Air Hostess wa kiwi kiwi.
Neiliang ki tnat sorkar da wan leh ka tnat District A.H. Veterinary, District Hand-loom Office wa kiwi tawan ki tnat sorkar deilang wa ki mar wa pynmih ki kamjooh da yaklam wei da e buit leh ya ki lain puræ wa ye ki wa dang puræ u chim ki yow yoh ki u kreh ha ki tnat sorkar wapher wapher.
Ha chwa u wai ya kani ka Edu Fest 2016 da em ka yalang paidbah hapoh ka Auditorium yong ka College heiwa u DC ka West Jaiñtia Hills da pynchlur ya ki khynnah puræ yow jied ki ya ki laiñ puræ wa yatoh wa ki yow man ki ki bru wa biang man da kreh ki. Da e nongmuna u pyn ya oo hi heiwa da ong u wa oo toh uwa da pass Mechanical Engineering tangwa ym em u i sap ha kani ka laiñ wei wa ym em yoh kreh ha ki laiñ Mechanical tangwa nadooh dang khain u ong wa em i thrang yong oo u man IAS. Kamtæ da ong u wa toh man i kiwa sian heiwa jied i ya ka mynried yong i.
U SP ka West Jaiñtia Hills u R. Muthu ong u wa heipor jied ya ki thaw puræ khmatam ki agent, toh u man i kiwa chalak yow lait cha thok ha kini ki bru. Ong u wa dang ha kini ki bnai wa da dep da em kiwa chah thok hadooh T. 23 Lak yow yoh ki khon u lai puræ.
Heijooh i por ynne ka sngi leh da klam ka kong Isabella Pakma kawi na ka bru wa yahluti heiyatoh wow yieñ hajrong yong i hi ki kjat. Kani ka kong man ko leh ka General Secretary, Women’s Group & Handicraft ka wa em ha Mookyneng.
Ya ki mar yong kani ka seiñ kani ka kong da wan dai ko cha kylleiñ ki ri ka pyrthai kam cha Thailand, South Africa wa kiwi kiwi. Da ong ko ym toh u dooh mynsien lada duna hei stad puræ puthi emkaam u em u raikut mynsien lada pyrchang i katwa em i khih i khan.
Discussion about this post