Shillong: Ka State Election Commission yong ka jylla da booh thong ko wow pynpsiah pyrtuid thymme hadooh palat chi lak ngut ki khynroo khyllood wa em hei rta 18-21 snem hapoh u Naiynru uni u snem. Ini i pynpsiah pyrtuid thap vote u sdang i nadooh ka 1 tarik Naiynru hadooh ka 31 tarik u jooh u bnai ha waroh ka jylla.
U Chief Electoral Officer (CEO) ka tnat Election ka jylla, u Fredrick R Kharkongor hawa yaklam u wa kiwa pathai khubor ynne ka sngi, da ong u wa du ha East Khasi Hills da em kamwa 52 hajar ngut kiwa em ha i rta 18-21 snem ki wym pu em thap pyrtuid kam kiwa ye u thap vote, wei ka Nongkrem Constituency toh kawa boon dooh kawa em 15 hajar ngut katwa ha kiwi ki Constituency won da em kamwa 5-6 hajar ngut.
U CEO da pyntip u leh wa ki wym lai skur, da pynbait wow pynman ya i pynpsiah pyrtuid ha ki chnong ki thaw ha kiwa em ki Booth Level Agent (BLA) yong ki seiñ saiñ pyrthai deilang wa ka tnat election.
Ya kiwa puræ won cha baarjylla, ye ki u thap pyrtuid deiwa pyndap ki ya ki lyngba ka Online Registration.
Ynne ka sngi neiliang u CEO da khut u leh ya ka yalang wa ki seiñ saiñ pyrthai waroh kiwa em ha ka jylla wow paan yarap hei thap pyrtuid wei wow ya phyllu yumut hei yatoh wa phah ka Election Commission yow pynman yei thap pyrtuid iwa khooid.
Heijooh i por, u CEO da ong u wa ka tnat Election da thooh bniah ko hajrong iwa pynemkaam ki baar jylla bakla yei pyrtuid wa i jait yong ki tre ri wei da chem ya 3 ngut ki baar jylla wa leh yeini.
Na pyrdi kini, ar ngut toh kiwa yoh ujor na ka kur Kharshiing heiwa da leh thok ki deiwa yaleh affidavit wow e jait cha ka kur Kharshiing ha ki EPIC yong ki. Uwi won toh uwa em pyrtuid ar tylli iwi ha kani ka jylla katwa iwi won ha Uttar Pradesh wei yei pyrtuid kini waroh da pyndam kam kiwa thap vote ka jylla.
Da ong u wa ka tnat Election yong ka jylla Meghalaya wa Assam da krehlang ki kammon wow khanglaad ya ki bru wa em ar tylli ki EPIC khamtam kitu kiwa sah ha khappood yong kini ki ar tylli ki jylla.
Discussion about this post