Shillong: Ka nasib yong ki kyrtong wa yakhun ya ka Election MDC cha ki ar tylli ki Autonomous District Council (ADC) da pynbna ynne ka sngi wei ha KHADC, mar chiteiñ ki MDC da rem ki lait na kiwa dam wow yakhun ha kani ka kynti.
Ha kani ka Election da sakhi yei jop ki ar ngut ki MLA wa yakhun wa kynthup ya u Gigur Myrthong (NPP) na Mawshynrut wa u Lambor Malngiang (Ind) na Nongkrem Constituency.
Hawa kyruiñ cha kiwa jop ha KHADC, ka Congress da jop ko boon ki MDC deiwa jop hadooh 10 ngut yeiwa da pynbood sa ka NPP kawa jop 7 ngut wa ka UDP kawa jop 6 ngut, ki kyrtong samen 3 ngut, HSPDP 2 ngut wa ka PDF da jop ko du na kawi ka Constituency.
Napyrdi kini, kiwa tam boon dooh ki MDC na kiwa jop toh u kyrtong na Mawlai Constituency, u Teiborlang Pathaw uwa da tam hadooh kamwa 7 hajar Vote pyrchah ya u kyrtong wa wan wa ar, u Marbud Dkhar yong ka Congress.
Katwa napyrdi ki kyrtong wa jop deiwa tam du kajiak toh u kyrtong ka NPP na Laban-Mawprem, u Mitchell Wankhar uwa da jop du 19 vote ya u kyrtong wa wan wa ar, u Ricky Shullai na ka UDP.
Ha Ri-bhoi District kawa em san tylli ki MDC Constituency, du uwi u MDC warim uwa da jop, u Victor Ranee (NPP), katwa ha kiwi ki Constituency ki paidbah da jied ki da kiwa thymme wow lai cha KHADC.
Hanlada wa ha kani ka Election da sakhi boon ngut kiwa thymme kiwa jooh man leh ki montri wa ki MLA kiwa da wan uiñ biang kam ki MDC kynthup ki ya u Ronnie V Lyngdoh (INC) uwa da jop na Mylliem Constituency, u Paul Lyngdoh (UDP) uwa da jop na Jaiaw wa u Martle N Mukhim (HSPDP) na Mawkynrew Constituency.
U Martle Mukhim man u uwi na ki MDC uwa da heh rta dooh na waroh ki kyrtong wa jop.
Discussion about this post