Shillong: Ka Shad Suk Mynsiem kawa 106 kawa da pynman ya ka le sngi lynter da ka Seng Khasi Sengkmie da poi noh ko cha wa kut ynne ka sngi heiwa da wan chimbynta kiwa chaad na kylleiñ ka ri-loom Khasi-Jaiñtia kiwa da poi waroh 1028 ngut.
Ki kynthai wa wan chimbynta waroh da poi ki 481 ngut katwa ki chynrang won kiwa da wan chaad da em ki 547 ngut.
Deilang wa kiwa wan chaad da em leh ki phaw hajar ngut ki paidbah wa wan hiar cha Madan Weiking ha Jaiaw yow sakhi ya kani ka sngi wa khaddooh ha pyrdi i ood i kieh ki ksiñ, ki bhuri wa kiwa ki tiar tem kiwa pynchongchit ya waroh khlem sangeh waroh nadooh chiteiñ sngi.
Ha kani ka sngi da wan sakhi lang da ka Montri ka Sorkar jylla, ka Roshan Warjri, u Lat ka jylla, u Banwarilal Purohit, u Chief Justice ka Meghalaya High Court, u Justice Dinesh Maheshwari, ki bru pawkhmat ka jylla, ki President wa Secretary ki tnat ka Seng Khasi, Seiñ Raij waphær waphær, kiwa yahkhmat ki Seiñ Khihlang wa kiwi kiwi.
Neiliang u President ka Seng Khasi, u Banteilang Rumnong da batai u ya i yumut yong kani ka chaad. Ya ki chynrang da pynchaad charood neidaw ki man ki ki wow kær wow yada, katwa ya ki kynthai won da pynchaad ha pyrdi neibhah ki man ki kam kiwa ri wa sumaar, kiwa kdup wa pynbha ya ka yung ka sem wa ka imlang sahlang.
Da ong chooh u wa hanlada ya ka jaitbru da tip ya ki kam kiwa tip bru tip blai tangwa sñiawsih u wa joor ki kaam pyrchah ya ki kynthai. “Kam ki Khasi toh u tip i ya ka burom wa ka akor wei wow kynmoo i u im tip bru tip blai khnang wow lait i na ki kaam sih yong ka pytrhai ha kani ka juk wa katni.”
Da pyntip u leh wa neiliang ka Seng Khasi jooh maham ko wei da sikai ko ya ki khon ki kti wow yait na ki kaam sih ka pyrthai.
Ya kani ka rukom Chaad da tip pyrtuid leh kam ka Shad Weiking neidaw wa pynman ya ka ha Madan Weiking.
Discussion about this post