Shillong: Ka sorkar jylla ympu em pyllait ko ya ka bai baam cha palat 50 hajar ngut kiwa yoh bhah na ka scheme Chief Minister’s Social Assistance Scheme yong u snem 2017-18 kawa toh u yoh ki manbei wa da yap kurim wa ki bru kiwa em i duna ha i doh i pran wei da kynjoh ko cha ka T. 50 Klur.
Ya ini da pyntip da u Montri wa pait ya ka tnat Social Welfare ka jylla, u Kyrmen Shylla hawa jubab yeiwa kylli ka MLA na Mahendraganj, ka Dikkanchi D Shira kawa kwah yutip lada ka sorkar da pyllait ko ya kani ka Scheme cha kiwa toh wow yoh bhah.
Hawa pynrap yeini iwa da kylli neiliang u MLA ka Mawsynram, u Himalaya M Shangpliang da kylli u yei daw wa slem wei hawa yarap wow jubab yeini neiliang u Montri Rangbah ka jylla da ong u wa ka jylla em ko hapyrdi i duna poisa, wei kani em ko ha ka tnat muna poisa ka jylla wei dang bichaar ya ka wei wow pyllait noh ya ka.
Da ong u wa kani ka Scheme toh ka yong ka sorkar jylla kawa da sah da boon bnai khlem ye u pyllait, wei ka sorkar em ko i bahkhlieh wow pyllait noh ya kani ka Scheme.
Discussion about this post