Jowai: Hajrong ka khubor wa da pynmih da u Wyrta wa yoh kem bhang ki pulit ka West Jaiñtia Hills ynne i janmiet da yoh chooh chooh ya ka yutip hajrong ini yoh kem ki pulit.
Neiliang u SP ka District u Lakador Syiem da ong u wa katkam ka yutip wa yoh ki pulit wa daw em ki mar wow challan namo kit tooh lyngba ka District, kamtæ heipor kamwa 2:00 waje i sngi ki pulit hapoh i yahkhmat u Mac Joel Marngar, Dy. S.P. (HQ) wa u Donkupar Moksha, Dy. S.P. (Traffic) chirup wa ka Anti-Narcotics Task Force da lai ki cha Soomer hajan ka Laad Jowai By-pass wow kynreh ya ki kari.
Heipor kamwa 3:50 i janmiet da pynsangeh yaka kari wa suba toh ka truck wa kit bhang wa em u No. CG-08 Z 3368 kawa yah da u Dharambir Singh (35 snem) uwa na ka chnong Sultanpur, Bihar wa uwa rap (Handyman) ya oo u Jay Praksah Yadav (37 snem) na ka chnong Sultanpur, Bihar.
Manda kynreh ya kani ka truck da chem ki ya 20 song u bhang wa da murieh ha i thaw chong uwa yah wei kawi ka song khia ko kamwa 11 kilo hadooh 13 kilo wei manda thaw ya waroh i khia da kynjoh i ya ka 247.15 kilo.
I dor yaaw uni u bhang da kynjoh i palat T. 50 Lak.
Hajrong ini waroh neiliang ki pulit dang pteiñ ki ya ka takit wei ya kini ki ar ngut da pynngat ya ki katkam ki kyndon ka aiñ.
Discussion about this post