Shillong: Ka Dorbar Shnong Laban, Seng Kynthei wa Seng Samla Shnong ynne ka sngi da pynman ki ya i pdiang sñiawbha ya kawa jop ha ka Talentica Miss India Global, 2020, ka Gargee Nandy.
Ya ka Nandy da pdiang sñiawbha na Red Cross Laban da u MLA ka South Shillong, u Sanbor Shullai wa ki dkhot yong ka Dorbar Shnong Laban, kiwa ha yung wa ki paralok, katwa ya ka leh burom da pynman ha Assam Club, Laban.
Neiliang u MLA ha kani ka sngi da ekti u leh ya ka Cheque wa T. 1.50 lak deilang wa ki pynkup wa syad dor. Hawa klam ha ka yalang, u Sanbor da ong u wa ini i jop yong ka Nandy toh i burom neibynta ym du ya ka Laban tangwa ya ka jylla wa ka ri waroh kawi.
Ka Nandy da jop ko kam ka Miss India Global ha ka rynsan wa da pynman haka 23 tarik u Kmaichonglad 2020 ha Goa, wei da ini i jop da wanrah burom ko ya ka thaaiñ North East waroh kawi, khamtam ya ka nongbah Shillong kawa toh ka thaw wa da kha wei da heh da san.
Hadien ini i jop ka Nandy daw pynkhreh ko leh wow yakhun ha kiwi ki rynsan yakob miat kynthai hapoh ka ri India wa cha baar.
Ka Nandy toh kawa chong wa sah ha Laban wei da dep ko wow pyndep ya i puræ na B.K. Bajoria School, katwa ya ka Bachelors in Mass Communication da pyndep ko na DSI Bengaluru. Nalor i puræ, da chah sikai ko leh kam ka Classical Singer, Dancer wei da em ko leh ya kiwi ki sap.
