Ki bor wa pait wa pynlai ka Modern Secondary School, Ialong ynne ka sngi da pyndep ki ya ka yalang kyrpang næ i pynpsiah dkhot ya ki 20 ngut ki khynnah skur ki wow tip noh neini chakhmat kam ki Junior Red Cross hapoh ka seiñ Indian Red Cross Society.
Ha kani ka sngi kam ka dak i pdiang sñiawbha ya kini ki khynnah da em ka yalang wa chongkun hei pynlai ka B. Pale, Counsellor Junior Red Cross Society, Modern Secondary School Ialong wei da wan sakhilang leh da u Ohiwot Laloo, Secretary IRCS, West Jaiñtia Hills Unit kam u kongsan, u Hanpaya Nongpluh, Life Member kam u symbood kongsan, u Hopeful Khongstia, Asst. Secretary IRCS West Jaiñtia Hills Unit, ka W. Phawa, Headmistress Modern Secondary School Ialong wa kiwa sikai.
U Ohiwot Laloo hei e kyntien kam u kongsan yong kani ka yalang da yaroh u ya ki bor pynlai ka Modern Secondary School, Ialong kawa man leh kawi na ki skur hapoh ka District wa da ye u sai u pynmih ya ki Junior Red Cross nadooh ki por ki snem wa dalai wei man ko leh kawi na ki Unit yong ki Junior Red Cross wa paaw hapoh ka jylla, hei pteiñ yei klam neibynta wow yoh ki khynnah yei tip wa bniah chaphang ka seiñ da kdaar u leh wow khana chaphang ka thong wa ka yurim yong ka Red Cross Society.
Chooh chooh da pynphooh ya kani ka sngi da ki rwai wei pynyoo sap yong ki Junior Red Cross Modern Secondary School Ialong kiwa kynthup ya ki First Aid kiwa man i kaam wa hakhmat yong ki Junior Red Cross neibynta wow yarap ya ki para bru hawa em i jia wym poi pyrkhat næ i takha i mynsoo yong ki bru.
