Ha ka yalang paidbah wa da pynman hei miet ka 22 tarik ha Madan Wahriong Mihmyntdu da ka NPP neibynta u paan kyrchaan ya u Dr. DRL Nonglait, u kyrtong MP By-Election cha ka Lok Sabha, neiliang u MLA ka Jowai, u Wailadmiki Shylla uwa man leh u Montri sorkar da pdiang burom u leh ya kiwa psiah thymme cha ka NPP kiwa na ka Jowai Constituency wa kynthup ya u MDC warim ka JHADC, u Brightstar Chyrmang, neitæ u Heibok Suting uwa jooh yakhun MDC na Amwi Khliehtyrshi Constituency wa kiwi hei sakhilang ki paidbah wa boon wa da wan wow ap u sñiaw yei kyntien na u kyrtong kamjooh na ki heh ka Party.
Ha kani ka sngi najrong u kyrtong MP da emlang leh u Symbood Montri Rangbah ka sorkar jylla, u Sniawbhalang Dhar, u MLA ka Raliang, u Comingone Ymbon, ka MLA ka Sutnga Saipung, ka Santa Mary Shylla, u CEM ka JHADC, u Thombor Shiwat najrong kiwi ki MDC JHADC wa kiwi de.
U Brightstar Chyrmang hawa e i klam ong u nachwa jooh em u ha ka NPP wei hadien wa mih da man u kam u Independent, neitæ hadien i lai luti i chong pyrkhat yoo u wa emkaam u chaniah biang ya kani ka Party kamwa jooh chaniah u nachwa, najrong wot ki paidbah wa boon ha ka jylla leh chaniah ki ya kani ka Party.
Kamtæ da khut kyntu u ya ki lok ki jor leh u kyruiñ ki cha kani ka Party wei u pynjop leh ya u kyrtong ka Party ha kani ka MP By-Election cha ka Lok Sabha, khnang yow ye u yasaaid u ya chiboon ki mat ha Parliament.
Neiliang ka Party ha kani ka sngi da pynyoo paidbah ko ya ki kattu kani ki kaam pynroi namo ki Development Project wa ka sorkar MDA da wanrah ko ha Ri-loom Jaiñtia hapoh i yahkhmat ka NPP, wei da pynlait paidbah leh ya i sur rwai Election u Dr. DRL.Nonglait .
Discussion about this post