Ynne ka sngi u montri rangbah ka jylla, u Conrad K. Sangma da ong u wa ka sorkar MDA da sdang ko ya ka Promotion and Incubation of Market Driven Enterprise namo ka PRIME Programme ha u 2019 wow kyrchaan ya kiwa seiñ kreh hapoh ka jylla, wei ya ini da ong u ha ka CM’s E-Championship Conclave 2021.
Ka PRIME Programme pait ko ya ki yaw, ki sap, ki stat ka juk katni wa kiwi kiwi ki wow myntoi ki bru kiwa seiñ kreh.
Ha kani ka E-Championship Conclave, u Conrad da ngam yillu u hajrong i chem u kam uwa seiñ kreh ha ka IT Sector ha ki 1990, deiwa ong u wa toh u em i mynsien hajrong i thmu wa kwah u leh neibhah lada em i mon em ka laad.
Da kyntu u ya kiwa seiñ khih wa ymtoh u pyrkhat du ya ki mar wa pynmih ki tangwa wow kheiñ leh yei dor khnang wow ye u poi cha ka thong.
Ha kani ka sngi da pynlait leh ya ka PRIME Annual Booklet wa ka PRIME ID wei da saam u leh ya ki Cheque wa ki syrnot cha kiwa seiñ kreh, kamjooh leh ya ka kynhun wa ar namo ka Cohort-2 2021 Batch Certificate wa ka Cheque wa T. 1 lak cha kiwa ha khlieh dooh na ki 25 ngut kiwa seiñ kreh wa T. 50,000 samen cha 25 ngut kiwa bood hadien ya kiwa yoh ya ka T. 1 lak.
Ha kani ka sngi da pynkup burom leh ya kiwa chah yah luti, chah pynheh pynsan (Incubation & Mentorship) hadien wa da pyndep ki 1 snem ya ini kiwa man leh kam ki Cohort-1 Batch 2020.
Ha uni u snem ka PRIME Cohort-2, 2021 da em em palat 1600 ngut kiwa yaleh wow yoh yei sikai.
