Ka President ka ri India, ka Droupadi Murmu da saam ko yaka Padma Shri Award cha ka Silbi Passah haka kyrdan Art kawa na Meghalaya haka yalang pynkup burom ynne ha New Delhi.
Ka Silbi Passah toh kawa sah ha Riatsamthiah, Shillong wei man ko kamwa kawa sikai Hindi kawa da chong-ngiah wei ka bru chemphang neibynta ka Sarva Shiksha Abhiyan (SSA) waka DERT (Directorate of Educational Research & Training) wei heijooh i por kawa pawnaam hei wow chna sur wei da yarap ko yaka SCERT, DERT hei wow e sikai ha ki Art and Craft, Acting, i chaad wa i rwai.
Iwa boon i kreh ko toh haka SUPW wa Music wei em ko leh ka chlem e sikai neibynta ki rwai tynre Khasi-Jaiñtia wa i tem yaki tiar tem tynre.
Da kha yaka haka 03-03-1952 wei da pyndep ko yei puræ puthi Bachelor Degree haka Subject Hindi (Kovid) wei da man ko kam kawa sikai Hindi ha Khasi Jaintia National Government Upper Primary School, Mawkhar Shillong ha u snem 1982.
Yow pynchlur yei pynemkaam ktien Hindi, da chimbynta ko ha ki Radio Programme, “Hindi Lesson”, wa da pynmih da ka All India Radio Shillong (AIRS). Kamtæ ha u snem 2005, da jied yaka wow kreh hapoh ka Central Institute of Hindi (Agra) yow pynkhreh yaka kot Hindi- Khasi Contrastive Grammar.
Ka Silbi Passah man ko leh kawa da pynchlur yow kyntu kynrong yei sur tynre kamjooh ka dustur riti hapoh ka jylla Meghalaya. Wei lyngba ka Department of Art and Culture deiwa ya krehlang waka North East Zone Cultural Centre (NEZCC), ka deilang wa ki bru wa yahluti ko da chimbynta ki ha kiwa boon ki tamasa hapoh ka ri kam haka South Zone Cultural Centre, South West Zone Cultural Central, West Zone wa kiwi de. Lyngba kini ki rynsan da yaleh ko wow pynyoo pyrthai yaka dustur riti ka Meghalaya. Da man ko leh ka kynthai Khasi wa nyngkong dooh wow chna yaka Hindi Skit wa da e pyrtuid “Hindi Bhasha Hamari Rashtra Bhasha Hai” kawa da pynmih leh ha Doordarshan Kendra Shillong. Ynnin u snem ki bru yong ka da lai pynyoo ki leh yaka chaad tynre haka “Adi Shaurya Parv Parakram Ka”.
Ka Silbi Passah da yoh ko leh chiboon ki khsunaam kam ka District Certificate of Honour wa da e da ka sorkar jylla ha u snem 2001, ka Seng Khasi, Seng Kmie Honorary Award (2008); State Award (2005); People’s Choice Award NETV (2005); National Award for Teachers (2006); Jeebon Roy Award (2008); Khasi Jaintia Welfare Award (2009); International Gold Star Award (Bangkok 2010); Seng Samla Seng Kmie Honorary Award (2011); Lady of Hope (Cape Town South Africa) (2012); U Tirot Sing Award for Art and Literature (Meghalaya 2014); Youth Affair Award (2019); 4th Northeast Unsung Heroes Red Carpet Social Award (2021) waka Sangeet Natak Academic Award (2021).
Discussion about this post