Ynne i step, chi kynta tam chwa wow kut i por wa booh u President Donald Trump ya ka Iran, u Trump da pynbna u wow sangeh i yasiat wa ka Iran neibynta ar tayaaw hadien i kyntu na ki heh ka ri Pakistan.
Chwa ini, ynnin u Trump da maham u wow pynwiar ya ka Iran hadooh wymye de ko wow khai-im biang.
U Trump da ong u wa i rai wow sangeh yasiat toh hadien i yaklam wa u Prime Minister Shehbaz Sharif wa u Field Marshal Asim Munir ka Pakistan kiwa da kyrpaad ya oo wow dam u dat bomb ya ka Iran.
Da ong u leh wa i sangeh yasiat toh hadien wa wai biang ka Iran ya ka Strait of Hormuz deiwa yaroh ya ki heh ka Pakistan wa ye u yaklam pynsuk ya waroh ar liang.
U Foreign Minister Abbas Araghchi ka Iran leh da pyntikna u yeini wa da poi i rai wow sangeh yasiat.
Da ong u wa manda sangeh i dat bomb ya ka Iran ki chipai ka Iran leh u sangeh ki u dat bomb ya ka USA wa ki lok ko deiwa ong leh wa daw wai noh ya ka Strait of Hormuz neibynta ar tayaaw deiwa ong leh wa ka USA da pdiang ko wow yaklam hajrong ki 10 kyndon wa booh ka Iran.
Ki 10 tylli ki kyndon wa booh ka Iran ya kiwa da pdiang da ka USA wow ye u yapynbait kynthup ki ya kini hawah:
1. Wow sangeh noh ya i dat bomb ya ka Iran
2. Ka Iran u wai hi ko ya ka Strait of Hormuz
3. Wow chah u pynjanai (Enrichment) ya u uranium
4. Wow pyndam ya ki Sanction wa da booh chwa
5. Wow pyndam ya ki Sanction wa da booh hadien
6. Wow tynyap ya waroh ki rai namo Resolution ka UN Security Council wa ktah ya ka Iran
7. Wow tynyap ya waroh ki rai ka Board of Governor ka IAEA
8. Wow su ya ka bai lutsan cha ka Iran
9. Wow kyrriah ya ki chipai ka USA na ka thaaiñ
10. Wow sangeh ya ka thma ha waroh ki Liang Pyrchah ya ka Islamic Resistance of Lebanon.
Discussion about this post