Katkam wa pyntip u SP ka East Jaiñtia Hills District heiyatoh wa iwa jia wa em kiwa tih mooyong da sahkut ki ha iwi i krem mooyong ha Sutnga, Umpleng, da pyntip nyngkong ya ini da u SP ka Silchar wa em kamwa 6 ngut ki bru kiwa da sahkut iwa da yoh yutip hei miet ka 30 tarik uni u bnai heiwa ki pulit ka District da ye ki wow chem yeiwa ye u man i thaw wa jia ini hadien wa da thooh slem hapyrdi i pynthut u slap wei da ye wow chem ya ini i thaw du heipor 6:00 waje ynne i step ka 31 tarik neidaw wa leh i miet kamjooh wym em kiwa sakhi wa wan chakhmat.
Deiwa ya krehlang wa ki bor District da sdang yei thooh heiwa da poi leh ki bru ka State Disaster Response Team cha ini i thaw.
Ya ini i thooh da leh hapoh i pynlai u Inspector General of Police (Law & Order) heiwa da wan chakhmat 6 ngut ki bru wa da sakhi ya ini wa jiat haka 30-05-21 heipor 5:00 waje i janmiet.
Katkam wa pyntip kiwa sakhi, da em i pdung syndet u Dynamite heiwa da em 5 ngut ki bru kiwa da sahkut wei da wan syndet ka um chapoh krem mooyong wei du hadien kattu katni por donhi da dap um wot.
Uwa emkti ha ini iwa jiat katkam wa pyntip kiwa sakhi toh u Sordar uwa tip pyrtuid kam u Nizam Ali uwa ym em leh iyi iyi yow pynlait ya kiwa sahkut heiwa u Ali da maham kylla u ya kiwa emlang wei da beh u ki na ini i thaw wa tih mooyong.
Hajrong i pyntip kiwa sakhi, da booh ya ka FIR ha Khliehriat Police Station deiwa pynngat hapoh ki kyndon ka 188/269/270/304A ka IPC deilang wa ka kyndon ka aiñ 21(5) MMDR Act wa Section 51(B) Disaster Management Act. Ya kiwa emlang ha ini i jia da ksoh ki pulit ki yow yoh ki yei yada wei ka takit dang lai ko chakhmat yow kem ya u Sordar kani ka paar mooyong.
Da kem leh ya uwi u bru hawa yatoh wa ini i jia wei hadien wa Test ya oo da chem toh uwa yoh COVID-19 wei da booh ya oo ha Isolation Centre, Khliehriat deiwa yang ki pulit.
Ki bru kiwa ym pu chem:
- U Abdul Karim uwa na Boko, Assam
- U Abdul Kalam uwa na Barpeta, Assam
- U Shyamcharan Debbarma, Tripura
- Uwi uwa ym tipmit uwa na Silchar, Assam
- Uwi uwa ym tipmit uwa na Silchar, Assam
Da kyntu leh ya kiwon kiwon kiwa tip chaphang ini i jia wow Phone ki ha kini ki number:
- 7005286235
- 7005933923
