Jowai : Ynne ka 26 tarik heipor kamwa 1:15 i sngi ha Lad Rymbai ha ka surok wow lai cha Rymbai wa jngai du kattu katni mitar na lad da pdung uwi u bom hadooh wa da piah lut ki yit yong ar tylli ki yung.
Katkam i ong ki wa em cha jan heipor wa pdung uni u bom da khih ki yung kamjooh leh da mih tdem wa yong bha.
I thaw wa pdung uni u bomb toh iwa em ha rood surok cha tidiang lada lai cha ka chnong Rymbai. Ki artylli ki yung wa em mar pyrchah wa i thaw pdung aw jan waroh ki khiandwar yit da piah lut hadooh kiwa em cha chrooh yung.
Ka tre yung ka kong M. Dkhar ong ko wa ym em wa mynsoo ha yung ki heipor wa pdung uni u bom. Ha poh i yung cha jrong thaw thiah cha kyndaw da chlai sa du ki yit wa piah hadooh cha u rana wa em ha rood ini i yung.
Ki pulit ki wa wan takit yeini da ong ki wa u bom toh u wa duna bor (low intensity) nediaw ym em mih i thlu (crater) heithaw wa pdung u wei kamjooh ym chem dien (trace) ya uni u bom. Da suba leh wa ye u man u bomb mynkhor (crude bomb) don hi.
Ha ini i jia ym em wa mynsoo neidaw waroh ki dukan man ki kiwa khang heini i thaw wei wa duna bru wa lai cha wah cha neiñ.
Ki tre dukan ong ki wa da haap ki tiar ki tar kamjooh ki yit wa em hapoh dukan leh da piah ki.
Kat hadooh wa pynmih ya kani ka khubor dang yang ya ki ‘Bomb Squad’ kiwa wan na Shillong yow takit (investigate) ya ini i pdung uni u bom.
Discussion about this post