Ka Superintendent of Police (CID), Meghalaya ka Supriya Das da pyntip ko wa ki pulit da yoh yutip ki wa da em ki bru wa chim kabu yei pyrtuid ki heh sorkar hadooh ki Montri sorkar wa kiwi kiwa mihkhmat paidbah heiwa da chim yei dur yong ki na ki Social Media Account yong ki yow pynemkaam bakla ya ki lyngba ka WhatsApp wa kiwi ki Messaging App.
Ka SP da pyntip ko leh wa kini da phah ki hadooh ki email wa ki SMS cha ki wakreh hapoh yong kini ki heh sorkar kiwa ym em suba iyi iyi leh heiwa manda pait ki hei Number WhatsApp da booh dei dur ki heh yong ki heiwa da phah ya ki wow thied tiar lane wow su poisa heiwa ha kiwa boon ki por da phah thied ya ka Amazon e-Gift deiwa phah lang ya u Link ha u WhatsApp lane ha email.
Kamtæ da kyntu ya ki paidbah wym toh u chah pynbiej ha kam kini wei lada yoh ki ya kam kini ki SMS wa ki WhatsApp Message wow pyntip ki wut wut cha ki pulit lane cha ka Cyber Crime Wing (CID) Shillong.
Kam wow pynkynmoo wa ha kini ki sngi wadep ki Montri Sorkar wa kynthup ya u James Sangma wa u Sanbor Shullai deilang wa u Speaker ka Meghalaya u Metbah Lyngdoh, da em wa pynemkaam bakla yei pyrtuid yong ki heiwa hapoh ka WhatsApp da booh dur Profile dei yong ki wa i pyrtuid heiwa ya i Message da phah pyn cha kiwa kreh hapoh ka chnat yong ki hi deiwa phah thied Gift Card na Amazon wei daw su poisa biang cha ki manda dep ki wow leh yeini. Heiwa kini kiwa yoh ya kani ka Message da leh ki yeini khlem da suba iyi iyi leh.
Puræ leh: Mih sa iwi i rukom thok bru lyngba u WhatsApp
