Ka Meghalaya High Court hawa chong bichaar ya ka PIL heiyatoh wa ki Plastic wa pynemkaam du chisien donhi (Single Use Plastic) heiwa uwa yaleh mukotduma da ong u wa kini ki jait Plastic toh kiwa ymtip kammon miat hawa wot yei dud leh da song ha ki Plastic kamjooh ki umsoh wei kini ki jait Plastic toh ki wym pyut hadien da ki spah wot hadooh ki hajar snem.
Kini ki Plastic da kylla man jhep ki kiwa dapoi hadooh 5.5 Million Tonnes wei waroh da pynemkaam ya kini ki Plastic nadooh kiwa chongdai ha rood sarok neidaw wa toh dor ki hanla dadep khang ha India wow pynemkaam ya ki Plastic wa stang hapoh 75 micron ha u snem 2021.
Ka High Court da ong ko wa lada ki bru na India lai ki cha Singapore ym nood ki wow noh ya ki Plastic kat chawa yoh neidaw wa tieñ ki yei chah pynchitom tangwa kini ki jooh ki bru manda liwan ki cha India da leh ki katwa ngait neidaw wym em wa pynchitom ki.
Kamtæ da ong wa ka sorkar Meghalaya toh u paitbniah ko yeini wei wow khang ya ki Plastic pyn na i thaw wa psiah ki neibhah pyn hajan ka High Court leh da yoo yei lang ki Plastic wei ki bor sorkar toh u pyrkhat ki kammon wow daiñ kuna deiwa rap heh ya kitu kiwa pynemkaam Plastic hapoh ka jylla neibhah du deiwa pynkrehkaam ya ka aiñ deiwa khor daw ye u wow pyndooh jait ya ki Plastic na ka imlang sahlang.
Da ong leh wa toh u sdang na ki thaw wa em ki Temple wei kiwa pynlai ymtoh u chah ki u em Plastic ha ki thaw mane wei lada em ki dukan wa booh Plastic, toh u khang khyrdep ki.
Chooh chooh da ong wa emkaam leh wow booh CCTV ha waroh ki Temple yow pyntikna wym em wa rah Plastic hawa psiah ki.
Ka High Court da phah ko leh ya ka sorkar jylla wow e jubab lyngba ka Affidavit ya iyi wa da leh ko yow khang yei pynemkaam Plastic hapoh le tayaaw deiwa kheiñ nadooh ka 16 tarik uni u bnai.
Discussion about this post