Hadien wa sdang poor bha i Video ha ki Social Media yong u K Vanlalvena uwa man u MP ka Mizoram, ynne ka sngi u khlieh pulit Additional Director of Police (Law & Order) ka Assam, u GP Singh da pyntip u wa ki pulit ka Assam da lai ki cha nongbah New Delhi wow leh yeiwa emkaam katkam ka aiñ pyrchah ya i klam uni u MP heiyatoh wa i jia ha khappood ka Asssam wa Mizoram ha ka 26 tarik uni u bnai.
Kam wow kdaw heini wa u Vanlalvena hawa yaklam wa kiwa pathai khubor ha nongbah New Delhi da ong u wa ki pulit ka Assam da psiah ki chapoh u pood ka Mizoram deiwa beh ya ki pulit yong ka Mizoram weiwa ki pulit ka Assam wa sdang u siat suloi wei neiliang ki pulit ka Mizoram da jubab ki yeini i siat chwa ki pulit Assam wei embhah ki wa ym em u tynyap ya ki pulit Assam waroh, deiwa maham u leh wa lada sa chisien u leh biang ki pulit Assam yeini daw tynyap lut ya ki waroh.
Ha ka 26 tarik uni u bnai da joor bha i awri hapyrdi ki paidbah wa ki pulit na waroh ar liang ki jylla hajrong i kajia pood heiwa da mih leh i yasiat suloi hapyrdi ki ar liang iwa da wanrah yei khlaad ki 6 ngut ki pulit ka Assam wa i mynsoo ki pulit yong ka kiwa em kamwa palat 50 ngut wei da em leh kiwa mynsoo na i liang yong ki paidbah wa ki pulit ka Mizoram.
Hajrong ini waroh neiliang u GP Singh da ong u wa daw chimkhia yeini i klam u MP wei da phah ya ki sahep ka CID wow lai takit ki oo wa emkti u sop-sop (Conspiracy) ha ini i kaam.
Chooh chooh u Singh da ong u wa ki pulit ka Assam da tyrwa ko T. 5 lak ya kiwa e yutip wow kem ya kiwa emkti ha ka 26 tarik weiwa da Register leh ya ka Case ha Dholai Police Station ka Cachar District hapoh ki kyndon ka Indian Penal Code (IPC) wa kiwi ki aiñ.
