Ki dkhot yong ka East Jaiñtia National Council (EJNC)-Sumer Circle, haka 14 tarik uni u bnai hapoh i yahkhmat u President u Sakilan Chyrmang, da hiar ki cha u sarok ka chnong Samasi uwa yabi waka Assam Quarry, Dima Hasao District wow khynra yaki kot ki sla yong ki baar jylla wa lai lyngba uni u sarok wei kamjooh ya kiwa wan mylla cha ka thaaiñ Sumer, East Jaiñtia Hills District.
Ha ini i khynra, ka seiñ da chem ko wa boon naki baar jylla wa lai lyngba uni u sarok wei kamjooh kiwa wan mylla cha kani ka thaaiñ ym em ki ki kot ki sla kiwa biang wei em leh kiwa ym ye u pynsakhiat wa man ki ki nong India.
Ha kani ka sngi, ka EJNC-SC da dawa ko leh na kitai ki baar jylla wa ki toh u pynbiang yaki kot ki sla ki yong ki nadooh ki Labour License, ki Work Permit, ki Trading License wa kiwi kiwi chwa wa ka seiñ khynra syndet biang ko, ka seiñ da klam che ko wa haka sien kawa ar ka seiñ daw pynuiñ ko naphang ya ki wym biang ki kot ki sla.
Neiliang yong u Sakilang Chyrmang, President EJNC-SC, da pynsñiaw u yei sñiawkhia wa khroo hajrong i wan buhai chnong yong ki baar jylla cha ka thaaiñ Sumer, EJHD khamtam hadien i yoo yeiwa jia ha Ichamati, East Khasi Hills District, kamtæ da kyntu yaki Dorbar Chnong ka thaaiñ Sumer wow pynkhor ya ini i wan buhai chnong yong ki baar jylla hapoh ka chnong ka thaw deiwa kyntu leh yaki wow e ya i krehlang wa ka EJNC-Sumer Circle, neibynta wow tikna yaka chongsuk chongsaiñ yong ka thaaiñ.
Discussion about this post