Ka High Court ka Meghalaya hawa chong bichaar ya ka mukotduma PIL wa da yaleh heiyatoh da dang em ki wym yoh thaw thangbru kiwa dang man Niamtre dang man Seng Khasi kiwa em hapoh ka jylla ki wym em man Christan næ Hindu, neiliang ka sorkar da pyntip ko wa ka Directorate of Urban Affairs ka sorkar Meghalaya da pynkhreh ko wow booh da ki Electric Hybrid Crematorium ha Shillong, Tura, Jowai wa Nongpoh wei da em leh kiwi kiwa dadep pynlait poisa yow chna kam ha Syllei-Iawkein, Nongstoin, Khliehtyrchi wa ha Jhalupara, Shillong.
Ka High Court da ong ko wa dang em hi ki thaw hapoh ka jylla ki wym em thaw thangbru hadooh wa hap rah ya kiwa yap cha jngai yow ye u pyndep yei niam, kamtæ da phah ya ki DC ki District waroh wow thooh ya ki chnong wym em thaw thang bru wa jngai hapoh 10 Km wei ki thaw wa em ya kini toh u kheiñ leh katwon ngut em ki bru ha katæ ka thaaiñ.
Da phah leh ya ki DC wow khut yachemlang ya ki Khasi, Jaiñtia wa Hindu lada ye u pynbor ya ki wow pdiang wow pynemkaam ya ka jooh ka thaw thangbru neibhah wa sariem i rukom thang ki tangwa ki rukom pyndep niam won phær ko wei na ini i daw kwah ki jar jiar hi wei lada ye wow pynsñiawthooh boi daw em ki wym pyrchah.
Lada ye leh toh u booh da ki por wow pyndep niam ya kawi ka jait niam næ deiwa yabhah ya ka thaw thang da jar jiar ka niam ka rukom.
Tangwa lada ym ngait yeini u pynemkaam lang, da phah ya u Amicus Curiae wow lai pait u dei bru yow pynsñiawthooh ya ki kattu katni ki phang deiwa ya mynjur yei rukom pyndep yei niam yong kiwa da khlaad.
Discussion about this post