Phah ka NCW wow kem ya kiwa emkti wow ah lyngkhot ya ka kynthai dep tæ murieh hapoh Fridge

Ka National Commission for Women (NCW) da phah ko ya ki pulit ka Karnataka wow kem ya kiwa emkti wow tynyap ya ka kynthai deiwa ah yei doh ko hadooh 30 lyngkhot dep tæ murieh ki hapoh kawi ka Fridge.

Da phah leh ya ki pulit wow e ki ya ka Report kawa bniah hapoh le sngi wei wow pyndep yei takit hapoh i por wa biang.

Kam wow kdaw heini wa kawi ka kynthai kawa 29 snem i rta da chem yei metyap ko ha ka 21 tarik uni u bnai iwa da chah ah lyngkhot iwa da jia hapoh i yung wa sah ko ha Vinayaka Nagar, Bengaluru heiwa i metyap toh iwa da pyut wei da andtaad da yap ko da boon sngi.

Ki pulit ynne da pyntip ki wa da tip ki ya uwa suba wa emkti wow leh yeini tangwa ym pu em yoh u kem ya oo. Uni u bru wa da suba wa leh yeini i kaam toh uwa na Odisha uwa da sah ha Bengaluru wei da ngait wa kattæ da em u ha West Bengal wei dang thooh ya oo.

Related posts

Yoh kem drugs kiwa chong chnong ka Namdong

November 23, 2024

Yoh kem ki pulit ya uwa lai maham bru da kawi ka Pistol

November 21, 2024

Ki pulit da pyntip ki wa da chem ki ya kawi ka Suitcase hajan ka Fridge wei da suba wa da thmu wow rah yei metyap ko hapoh kani ka Suitcase.

Yei metyap kani ka bru da chem hadien wa kiwa sah hajan da sñiaw ki yei sma heiwa da pyntip ki cha bei kani ka bru hei miet ka 20 tarik wei da wan ko ha ka 21 tarik heiwa da chem wa ini i yung wa sah ko toh iwa da khang na lait tangwa manda yoh ki u psiah da yoo lakam wa chah lute i yung wei da yoo ki leh yei snaam wa ki kseiñ hajan ka Fridge.

Kamtæ da wai ki ya kani ka Fridge wei da chem ki yei metyap iwa da chah ah lyngkhot.

Ki pulit da antaad ki leh wa kani ka bru da yap ko san sngi chwa wow chem ka.

Kani ka bru da tip kam ka Mahalakshmi toh kawa da heh da san ha Bengaluru wei kawa da em kurim uwa kreh rap jngai na Bengaluru katwa ka kreh ko hapoh kawi ka Mall.