Jowai: Ka Sorkar India lyngba ka Ministry of Health and Family Welfare, Nirman Bhawan, New Delhi ha ka 20-02-2019, da phah ko ya ki Hospital yong ka sorkar pyrdi yei rukom dai ya ki dawai wa kiwi kiwi khamtam ya kiwa dooh wa duk deiwa ong, “Da pyntip cha kani ka Ministry wa na ki por cha ki por wa kiwa kjut khamtam kiwa dooh wa duk kiwa yoh kjut Cancer wa kiwi kiwi ki jait kjut kiwa wa chyrkhei kiwa chah sumaar ha All India Institute of Medical Sciences (AIIMS) wa kiwi ki Hospital yong ka sorkar pyrdi kiwa em ha kylleiñ ka ri, da chah pynbaad ki wa kiwa pynlai ya kini ki Hospital jooh phah thied ya ki dawai na ki Pharmacy yong ki bru samen kiwa em hapoh u pood u ang ka Hospital kiwa da yoh bor wow dai dawai na kiwa pynlai ya ka Hospital.”
Kamtæ hajrong kani ka phang, da pyntip cha waroh wa khnang wow pynman ya i sumaar kawa ye waroh u yoh, ka sorkar pyrdi da chim ko ya ka luti wow wai ya ki AMRIT Pharmacy waka Jan Aushadi Stores ha kiwa boon ki Hospital/Institution kiwa hapoh i pynlai da ka sorkar pyrdi ha Delhi wa chabaar ka Delhi.
Da phah ya kini ki thaw sumaar wow batai bniah ki cha kiwa kjut khamtam kiwa dooh wa duk yow pynemkaam ki ya kini ki Pharmacy Sorkar kiwa dai ya ki dawai heidor wa duna yow lait wow thied ya ki dawai kiwa hap wow su ar chah na kiwi ki Pharmacy wa pynlai da ki bru samen.
Kamtæ ka NEIGRIHMS da pynbna paidbah ko wa kiwa wan chah sumaar ha ka wa ka leh em ko ya ka AMRIT Pharmacy ha ka mala wa hapoh hajan ka Orthopedics OPD heiwa ki dawai wa kiwi kiwi da dai hei dor wa duna kam ya ki tiar Cardiac Stent wa Pacemaker. Ki dawai Cancer wa kiwi kiwi lada ym em ye kiwa chitom wow booh ya i dawa yong ki ha ka Pharmacy waka AMRIT Pharmacy kawa pyntikna da kiwa pynlai yong ka NEIGRIHMS wow pynyoh ya ki hapoh 48 kynta. Da pah ya waroh kiwa kjut wa chitom kiwa em ha NEIGRIHMS wow chim ya kani ka kabu yow yoh bai dawai ha i dor kawa biang na ka AMRIT Pharmacy kawa em hapoh ka NEIGRIHMS Hospital.
Discussion about this post