Ka sorkar Meghalaya ha ka 14 tarik uni u bnai lyngba ka Home (Political) Department da pynbna ko yei pyrtuid u wow khlieh ya ka Judicial Inquiry Commission heiyatoh wa iwa jia ha ka krem mooyong ha Mynsngat, Thangskoo ha East Jaiñtia Hills heiwa deiwa em iwa pdung da yap boon ngut kiwa kreh hapoh ka paar mooyong.
Ya kani ka Commission da thung yow khlieh da u Justice (Retd.) RS Chauhan kam u Chairman uwa jooh man kam u Chief Justice ka Uttarakhand wa ka Telagana.
Kani ka Commission u em ko leh ar ngut ki dkhot kitæ u H. Nongpluh, IPS (Retd.) wa u P.S. Dkhar, IAS (Retd.) ki wow tih bniah yeini wa jia.
I kaamram ki toh wow chem yei daw wa jia ha krem mooyong ha Mysngat-Thangskoo haka 5 tarik uni u bnai wei wow e ya ka Report wa bniah hadooh wow chem leh wa lada tlot i krehkaam ki bor sorkar wow yada yeini kamjooh iyi wa emkaam u pynkylla hei rukom krehkaam.
U takit bniah ki leh yei daw wa em i tih mooyong pyrchah aiñ, neitæ wow e buit leh cha ka sorkar kammon wow leh yow lait u jia ini.
U thooh laad leh kammon wow yarap poisa lyngba ki Scheme cha kitu kiwa chah ktah kiwa jooh im-ja nei khih mooyong chwa wow chah khang ha ka NGT.
Sa iwi toh wow e buit cha ka sorkar kammon wow lai kyrpaad ya ka President ka ri yow pynkylla ya ki kyndon yong ka aiñ Mines and Mineral Development Act, 1957 næ kiwon kiwon ki aiñ ka Parliament hapoh ka Para 12(A)(b) ka Sixth Schedule deiwa pyrkhat yei rukom tih mooyong yongrim namo ka Traditional Mining kawa jooh myllien ha Meghalaya.
Kani ka Commission hap ko wow e ya ka Report ko hapoh 6 bnai nadooh wa pynmih ya kani ka pynbna.
Discussion about this post