Jowai : Ka Dulong man ko ka Chnong kawa ye ki paidbah na kylleiñ ka Jowai u lai thied tiar thied tar wa boon jait na ki dukan dukdoh wa em hapoh u pood u ang yong ka, neibhah boon ki dukan heini wai ki hadooh 12 waje i synyaw.
Ha kini ki khajak sngi ka khubor wa tikna da ong wa ka Dorbar Chnong Dulong da pynmih ko ya ka hukum wow phah khang noh ya waroh ki dukan hapoh 11:00 waje i miet.
Kani ka hukum u sdang ko u krehkaam nadooh 1 Naikhynde.
Hei yoh u yaklam wa u Secretary ka Dorbar Chnong Dulong, u ma K. Lato da pyntip u wa hadien wa yoh boon ki ujor na ki paidbah ka chnong hei yatoh wa wan miet ki bru chirup i tem sur yongheh na ki kari, ka Dulong da chong pyrkhat ki heiwa da rai wow phah khang noh ya ki dukan hapoh 11 waje i miet.
Da ong chooh chooh u wa yeini da leh kam chibynta wow wanrah yei chongsuk chongsaiñ ka chnong ka thaw.
Discussion about this post