Ka East Jaiñtia National Council (EJNC) Khliehriat Circle hadien wa da yoh ya ka ujor na kiwa boon wa lang ka chnong wa ka dukan yong ki baar jylla dang wai bait ko hadien iwa jia ha kini ki sngi wa da dep wa em ka khynnah kynthai wa chah tba kti ha ki baar jylla ya kiwa da kem ki pulit tangwa kani ka dukan dang wai bait ko da kitu kiwa hayung kiwa chah kem.
Kamtæ ka seiñ hapoh i yahkhmat u General Secretary ka EJNC-KC u M. Sukhlain wa u President ka EJNC-Khliehriat West Unit u Shanborlang Bamon da i sñiawkhia da lai ki wow khynra ya katai ka dukan wa em ha Iawpyngkat, Khliehriat wei da chem leh wa ym em Trading License ko leh, kamtæ ka seiñ da phah khang ko chisyndon ya katai ka dukan khnang wa kam ini i jia wa sñiawsih ym jia de.
Ka seiñ da maham ko leh ya kiwi ki dukan ki baar jylla wa ym toh wow chim kabu yei man chida yong ki khynnah kynthai ki yong i.
Ka seiñ daw lai ko leh wow e dei thoh cha u Licensing Officer ka JHADC wow pyndooh noh ya ka License yong kini ki baar jylla kiwa da mut wow pynthut ya ka imlang sahlang.
Purea leh: Chah kem ki arngut wa thmu wow slaitbor ya ka khynnah ha Khliehriat
