Ka Environment Co-ordination Committee (ECC), deilang wa ki waheh chnong wa ki khon ka Elaka Sutnga, da e khublei ki ya u DC ka East Jaiñtia Hills District neibhah wa hadein wa da booh ya ka ujor ha ka 23-06-2021 da chimkhia u yei kaam deiwa phah ya ki Show Cause Notice cha ki tre kharkhana thang rngaw mooyong namo ki Coke Factory wa hap ki wow jubab hapoh 10 sngi. Kamtæ ini da kut i ha ka 14-07-2021. Heiwa u DC da ong u wa boon na kini ki kharkhana ym em jubab ki wei ym em wan mih ki cha ka oo wow pynsakhiat wa krehkaam ki kam ka aiñ. Wei ini pynyoo ko wa kiwa boon da pynkrehkaam ki ya kini ki kharkhana dei wym em ya ki kot ki sla ki wa biang katkam ka aiñ.
Kamtæ ha ka 15-17-2021 u DC da pynmih u ya ka hukum wow khang ya waroh kini ki kharkhana hapoh ka District ki wym em ya ki kot ki sla kam ka CTO wa ki wym bood katkam ka aiñ.
Ka ECC ynne ka 16 tarik da lai mih ko chakhmat ka yungkrehkaam u DC yow paan pynche hajrong ini. U DC da ong u wa daw yang u kattu katni sngi hadien wa da pynmih ya kani ka hukum. Wei lada chem wa dang pynkreh yabor, u DC ym banse u wow lai khang tala ya ki kharkhana wei kamjooh u DC da kular u wow e leh da ka mukotduma lada kini ki karkhana ym bna ki ya ka hukum yong oo.
Kamtæ katkam i chem yong ka ECC, da ong wa wot ya kitu kiwa da yoh ya ki CTO leh ym em lai ki katkam ka aiñ. Neibhah kiwa yoh ya ka CTO toh yei yong samen tangwa da pynkrehkaam ki ya ka deilang namo kam ka Cluster wa 3 lane 4 tylli kini ki kharkhana kiwa krehkaam hapoh i jngai du kamwa 1 Km.
Ka ECC deilang wa ki waheh chnong ka Elaka da paan ki na ka State Pollution Control Boad wow pynman chwa ya ka Public Hearing chwa wow e ya ki kot ki sla khang wow pyntikna yei kyrchaan ki paaid ka Elaka kiwa chah ktah na kini ki karkhana.
U Bas Bareh, uwa man uwi na ki rangbah na ka chnong Jalaphet, da ong u wa ha ki kattu katni ki snem wa da dep, da em kam kini ki karkhana wa sdang hapoh ka chnong tangwa neidaw wa ki khon ka chnong ym chah ki ya kam kini ki karkhana wa ktah ki yei chait i khiah yong ki khon ki kti wa ya ka mynried hanla da yoh ya ka NOC tangwa dei bor ki paidbah ye wow pyndam ya ka. Kamtæ ka chnong hi da beh ko ya ki karkhana wei ha i jooh i por da khut lang u ya ki rangbah ki khynroo ka Elaka waroh kawi wow kyrhchaan ya ka ECC yow mih chakhmat wei wow bood leh ya ka nongmuna wa ka chnong Jalaphet da leh ko.
Ka ECC da chem ko leh yei thok chukor yong kini ki karkhana wa da e ki ya ki Report cha ki chnat waphær waphær deiwa ong wa ym em ki chnong lane ki thaw sah hajan yong ki deiwa pynyoo ya ki chnong wa rap jngai kam ka Khliehriat wa ka Ladsutnga.
Ka ECC hadien wa da chem ko yei kheiñstiñ yong ka Pollution Board wow yada, ka ECC ym banse ko wow phah cha ka Human Right Commission wow tuklar hajrong i chait i khiah yong ki hajar ngut kiwa chong chnong yong ka Elaka.
Ka ECC da kyrpaad ko leh ya u Montri wa pait ya ki khloo ki kjam, u James Sangma wow pait bniah hajrong ini i kaam wei wow khang chisyndon ya kini ki karkhana wa pyrchah ya ka aiñ.
Hajrong ini waroh, ka ECC leh da pynkhreh ko wow e da ka PIL lada ka sorkar ym bna ko yei dawa yong ki kam ka ECC ka Elaka.
